■林卓廷見到張超雄嘅「救命言論」，即刻製圖出po。林卓廷fb圖片本是同根生，相煎何太急？一直叫「主留飯民」總辭，但自己就仲未辭職嘅「議會陣線」立法會議員朱隊友（朱凱廸）近日又狙擊同事，話佢哋同民意脫晒節，若避戰求和就等於俾人打完左臉再打右臉。不過，薑都係老嘅辣，工黨議員張超雄唔止逐點駁斥朱隊友，仲挑機問如果議會真係咁冇價值，「我們是否不應再參選？」再做民調決定去留嘅鴿黨（民主黨）林卓廷即刻轉發呢番救命言論，結果？咪激起攬炒派再一次分裂嗌交囉。
企喺「抗爭派」嗰邊嘅朱隊友近日喺facebook發文，話「主留飯民」有三個拒絕心態：一係拒絕置身喺當下「重奪選舉權」嘅政治鬥爭，所以顯得離地同退縮；二係拒絕面對港人對佢哋侵犯民主原則嘅憤怒；三係拒絕承認「議會抗爭」已被「全面封殺」。佢話，向民眾承認「議會已廢」同杯葛嚟緊一年嘅議會先係正路喎。
張超雄就留言反駁，講到明覺得自己「責任上」要留守喎。佢聲稱留喺議會先係「置身政治抗爭」，仲反問啱啱同佢一齊跟進屯門青山灣入境事務中心（CIC）絕食事件嘅朱隊友：「因為我們的議員身份才能短時間內進入CIC探訪及與入境處開會嗎？若果議會真的半點價值都沒有，我們是否不應再參選？」
林卓廷見啱聽即轉發
見張超雄挑晒機，想繼續選嘅朱凱廸自然無聲出，而林卓廷亦食住上，喺fb轉發有關內容，仲大讚「超雄兄擲地有聲」。係囉，既然咁擲地有聲，做咩鴿黨仲要做民調定去留啫。
不過，鴿黨今次民調事件咁肉酸，好多攬炒派支持者早已睇唔過眼。「Monica Tam」話︰「比（俾）中央委任這些所謂議員，永遠都抬不起頭做人！」「Soso Wong」質問︰「點解唔迫佢選舉？」「Ray Li」直情話︰「慳啲啦張超雄擲地有聲，佢啲（呢）四年做過啲乜嘢呀？」
另一方面，攬炒派中亦有主留支持者鬧爆呢班人。「Ken Wong」就揶揄：「『抗爭派』變政治潔癖派，按佢哋講法，參選會美化這個不民主的議會，下屆唔洗（使）選，完。」「Payton Eye Tian」話︰「講得好！如果議會咁冇用，話放棄就放棄，咁『初選』黎（嚟）為乜？」
「Henry Chung」認為大家索性一拍兩散唔好嘈：「如果確定分裂，其實可以不須齊上齊落......各自選民亦唔需要含淚投票投予對方，『抗爭派』亦唔需要民主黨的捐款，亦唔需要公民黨的法律支援，各行各路就算。」
搞成咁，怪得邊個？咪就係怪攬炒派長期一時一樣迫死自己囉。 ■香港文匯報記者 鄭治祖