■「書生百用」將去年張屍體相打格，叫網民唔好再傳。 「書生百用」fb截圖攬炒派舊年一再老作示威者「被自殺」，屈警方殺人棄屍，浮屍海面嘅陳彥霖就淪為攬炒派上位嘅人血饅頭，有攬炒派仲一度想滅陳母聲，話佢都已經俾人滅口。不過，陳母近日出席死因庭，言論一再踢爆攬炒派嘅大話，攬炒派只好催眠「同路人」，廣傳一張墮樓死屍嘅相，誣衊陳母舊年「已死」。點知攬炒派元朗區議員王百羽就澄清，自己當時曾陪相中死者嘅家屬認屍，百分百肯定唔係陳母，叫大家咪再誤傳消息。玻璃心碎滿一地嘅攬炒派惱羞成怒，仲鬧王百羽收錢幫對家講嘢??。
陳母近日喺死因庭作供，講述個女生前喺女童院自殺不遂，甚至要打鎮靜劑控制情況，但攬炒派仍想喺死者身上榨出血，於是遷怒死者家人，甚至用死屍相「證明」陳母舊年11月已喺天水圍墮樓身亡，誣衊政府搵「臨時演員」扮死者家屬。
拒信「假陳母屍體」係男性
「黃絲」facebook專頁「書生百用」就將張相打晒格叫網民唔好再傳，因根據傳媒當日報道、陪同認屍嘅王百羽同當日修復遺體嘅伍桂麟，都肯定相中屍體係男性。王百羽其後亦轉發帖文話，親眼確認屍體非陳母，而死者家中亦有遺書，仲話為咗令死者安息同減少對家屬嘅騷擾，希望大家唔好再誤傳消息。
不過，班攬炒派就唔肯接受現實。「Tommy Lee」質問：「點解釋條屍長頭髮（係）男人？面青無血，唔新鮮？」「華芝利」亦質疑：「點解當時唔出黎（嚟）澄清？任由佢在網上發酵？事隔成年先黎（嚟）澄清？咩玩法？」
「Chan Billy」就睇唔過眼：「乜香港幾時唔比（畀）男人長頭髮？第一位受靶（被控暴動罪）果（嗰）位社工（劉家棟）已經係長頭髮 」。「Jovial Fung」就貼出王百羽當日喺facebook嘅帖文，「當時已經即刻澄清咗，呢一年嚟都提過幾次。你自己成年都無follow（跟進）事態發展......又懶得search（搜尋）返上年啲post嚟睇然後就×人今日先嚟澄清係咩玩法？」
但大家永遠都叫唔醒扮瞓嘅人，「Kitty Sin」就批評：「假的真不了！請你不要扮知道真相，明眼人都睇到是假証（證）人！」「Angela Hui」更話：「你叫死者講佢唔係陳彥霖呀（阿）媽我就信啦！你收咗好多錢？近排好等錢駛（使）？竟然幫對家講嘢？」 ■香港文匯報記者 鄭治祖
