鄭秀文與蔡卓妍現時已好老友。香港文匯報訊（記者 梁靜儀）鄭秀文（Sammi）與蔡卓妍（阿Sa）相隔多年再次合作主演的電影《聖荷西謀殺案》即將上映，日前二人接受訪問，大談再次合作的感受。曾經歷過沮喪的鄭秀文自爆性格使然，曾主動替阿Sa做輔導員傾心事。
今次是二人繼2003年合作電影《戀上你的床》後再次合作， Sammi自言看着阿Sa長大：「阿Sa嗰時好細個，我哋會Hi同Bye，食飯未？差啲問妎�咗奶未？𠵱家就乜都傾，始終佢喺呢行經歷又唔係淺，成熟到可以傾啲正經話題，有少少意想不到佢比我想像中佢個人成熟過佢外表，雖然好似食咗防腐劑，但傾偈及同人相處都係好顧及別人感受嘅一個人，同佢合作會好舒服。」
Sammi發短訊開解阿Sa感動
阿Sa指自己當年仍是新人，因比較害羞，沒有太多勇氣跟Sammi這位前輩傾偈，現在人成熟了，加上大家有共同朋友，多了話題可傾，又大讚Sammi好人：「Sammi嘅好唔止係合作嘅好，我成日都記得佢，當年同佢唔係好熟，自己面對人生唔開心嘅事，Sammi就透過大家中間嘅朋友，發短訊畀我，覺得好好，嗰一刻好感動同窩心。」
問到Sammi當時是否觀察到阿Sa有不快？阿Sa則解說：「應該係有新聞報道出嚟。」Sammi就說 ：「我（年紀）始終大阿Sa咁多，人生經驗豐富啲，我性格係咁，自己又經歷過沮喪，會比較敏感，邊啲人開心啲，呢排可能經歷緊情緒唔開心，同有啲事未必能解決到，咁我就好願意分享自己感受，我係過來人，又或畀啲鼓勵，可能自己係有經歷嘅人同自己性格喺呢啲事上面比較主動，唔會覺得尷尬同害羞 ，如果打到畀對方，對方又覺得唔使，心領喇咪算，如果好傾就再一步傾偈，睇吓有咩可以做。」
問到阿Sa那次Sammi能否幫她解決到問題？阿Sa說：「我覺得好窩心，嗰一刻心情係有幫助。」Sammi笑說：「實際解決唔到，傾完仲衰咗、煩咗。」她又記起之後阿Sa有一次還帶了阿嬌（鍾欣潼）上她屋企，又是傾一些問題，笑言自己像社工。
說回電影，Sammi指今次的角色有一個空間及層次讓她表現不一樣的演出，演出亦很突破，是她過去的愛情小品入面未見過的演出，她很多謝導演對她的信任，相信她可演到阿Ling這個比較複雜的角色，而她亦認為現階段自己的人生經歷，豐富了演這個角色的說服力，相反太年輕去演反而稍欠說服力。
鄭秀文刻意增肥近10磅
一向都着重身形的Sammi，演出前更刻意谷肥自己，增肥了8至10磅，而甚少拍親熱戲的Sammi透露拍的時候只脫剩胸圍，對她來說有點大膽，幸而沒有太尷尬及緊張的感覺，因她平日做運動時都是着運動bra top，只是有一兩秒意識上較為大膽，不過她之前在大銀幕上睇過，該兩場戲刪剪了少少，覺得也沒所謂，因love scene從來都不是這部戲的重點。
她又透露角色有點沉重，會歇斯底里及有黑暗一面，問到拍攝期間會否好抑鬱？Sammi說：「又唔會抑鬱，我會將自己盡量箍喺某一種情緒入面，去到片場都會咬住個情緒，心力上比較辛苦，而呢套戲又比較多呢啲場面。（戲入面好多嗌交場面？）好多場戲超越淨係嗌交，更多係內心情緒嘅呈現，如果用嗌交兩個字就輕鬆咗。」Sammi又稱今次最大挑戰是角色好立體，複雜到每一場戲都會對她有不同發現，似洋葱一層層去拆解阿Ling這個人物。
問到角色對愛的執悟可似她呢？Sammi說：「我唔執悟，我個角色反差比較大，阿Ling對愛情嘅執悟、癡迷與痛恨係好強烈，係病態，我自己就唔係，喺愛裏面唔好選擇咁強烈嘅恨，咁會帶來好大傷害同痛苦。」 Sammi不諱言對自己今次的演出好有信心，因事前有足夠時間讓她做準備，她笑說：「以前拍杜Sir 啲戲入到片場先知自己要做咩，今次對我嚟講係個新發現，因為拍好多戲都冇劇本，今次睇到好唔一樣嘅自己。」
至於阿Sa的角色就較輕鬆，她笑說：「在三個主要角色中，Yanny是最簡單、輕鬆的一個，演繹上唔需要有好多內心戲，有少少緩和氣氛嘅感覺。」影片有部分在加拿大拍攝，重返成長地開工的阿Sa，至今仍非常難忘該段日子，不過她最開心是當地工會規定演員一星期只開5日工，有2日休息，作為演員自然好舒服，如果香港可以這樣就好了。
場地：香港維港凱悅尚萃酒店
On Sammi
髮型：Joey Hui @Hair culture
化妝：San Chan
形象：Tanglai, Tungus Chan, Matthew Chan
服裝：Celine
首飾：Tiffany & Co.
On 阿Sa：
髮型：Heibie Mok @ Hair culture
化妝：Yannes lee @ndnco.co
形象：Pipa Creative
服裝：I.T Apparel, Harvey Nichols, Iijin