■家燕姐笑言換上新髮型，好多fans都唔係好認得自己。香港文匯報訊（記者 梁靜儀）薛家燕今年首次推出自家品牌流心奶黃月餅， 在疫情下銷情不俗。日前家燕姐應邀到荃灣某商場出席慶中秋活動，家燕姐更換了新髮型：「呢個新髮型係咪好特別呢？其實想換吓形象，頭先我出嚟時，好多fans都唔係好認得，因為唔見咗粒癦，我覺得呢個新髮型後生啲、有新鮮感。」家燕姐表示已有大半年沒逛商場， 來到見到好多朋友支持感到好開心，中秋節是一個佳節，希望她的月餅，令大家食得開開心心。
家燕姐的大女珊珊因工作加上疫情，在美國逗留了差不多大半年，她希望大女可以趕回港過佳節：「珊珊喺美國差唔多大半年，佢現在book緊機票，但返到嚟要隔離14日，希望趕及一齊過中秋節啦！（會唔會出去食飯慶中秋？）到時睇，如果限聚令有禁制就喺屋企食，但唔使我煮，因為我細女現在煮飯好叻，仲有我新抱，呢個疫情佢哋日日都煮餸煮飯，好好味！咁喺屋企食都好開心，或者食完飯食埋月餅上山頂賞月。」