第一場、第四班、一二○○米。「安旋」上季三月已在港展開操練，於季尾密密試閘，基本狀態已備，不過留以有待，今季評五十二分起步大把上升水位。「安旋」三歲愛爾蘭自購新馬，來港後運上從化作基本訓練，七月七日運回香港試閘，以輕鬆姿態掄元，姿態可人，更吸引地方是此駒的血統，其母所誕下的子嗣不乏分級賽盟主，包括愛爾蘭打吡冠軍「研究大學」（一八年曾出戰香港瓶），或許「安旋」質素有所不如，但現居四班肯定是過客身份，以質素來計冀可連捷連升，值得長線追捧，今次頭啖湯唔好錯過。
第二場、第五班、一六五○米。前季兩戰新馬賽均大敗廿個身位開外嘅「榮彩大道」，上季復出安排渡江跑谷草一千米，雖然尾二過終點，不過所負距離大幅縮減至三個幾馬位，原以為進度已有起色，但打後表現持續回落，七月份出爭泥地千二更以卅三個馬位之遙遠遠大敗。睇番「榮彩大道」出道雖然兩季，但只跑過六仗而已，除咗馬匹進度徘徊之外，馬房部署亦有所保留，並未見真章，今季轉四歲正處馬匹收成期，以過往多番予人好感嘅試閘走勢，肯定絕非無戰鬥力之流，初出要提防。