■張國鈞揶揄傳統「飯民」根本唔想「總辭」。 張國鈞fb截圖「你炒我，我就辭職！」唔好笑，傳統「飯民」真係講得出呢啲咁匪夷所思嘅說話。針對普遍市民連日請願，要求特區政府DQ 4名喺原定今年舉行嘅立法會選舉提名期中，被選舉主任裁定提名無效嘅現任議員，攬炒派立法會議員前日就舉行記者會，話4人如果被DQ，佢哋先會「義無反顧集體總辭」。唔少原本已經不滿「飯民」議員延任嘅「抗爭派」網民就冇眼睇，話估唔到佢哋為「糧支」可以咁冇骨氣。
「飯民」議員早前為咗延任，唔理「抗爭派」同部分支持者反對，絞盡腦汁整咗個結果啱啱好夠數留低嘅民調出嚟，惟延任一個多月就面臨被DQ嘅危機。如意算盤打唔響都算，最慘係佢哋今次聲稱「總辭」嘅決定，唔止俾「抗爭派」笑馬後炮，仲得罪埋當初叫佢哋延任嘅支持者。
「人民力量」創黨主席劉嘉鴻就喺facebook貼文揶揄：「DQ候選人你唔總辭，DQ當選人你又唔總辭，取消立法會選舉你都唔總辭......依（??）家人地（哋）唔畀你做一個冇授權嘅位，明明冇DQ，你就走去總辭。」
佢又批評呢刻仲撐「飯民」議員嘅盲粉：「留又支持，總辭又支持，你班傻×究竟『泛民』做咩先唔支持㗎？就係你班人，縱到班垃圾以為自己做乜都啱囉。」
「人民力量」主席袁彌明發帖道：「義無反顧總辭？DLLM啦被人逼走咋，義無反顧！」「黃絲偽人」杜汶澤亦發帖話：「俾人趕至肯走，真×係唔怕醜！」油尖旺區議員李傲然亦話：「其實點都會好尷尬，咁點同當日支持你地（哋）留任嘅人交代。」
張國鈞寸「總辭」得把口
民建聯立法會議員張國鈞亦發帖揶揄，笑呢班經常將「抗爭」掛喺口邊嘅「飯民」議員，喺記者會講完一大輪都唔會立即「總辭」表達「抗爭」意志：「一句話總結剛才反對派個記招：『我哋會總辭，不過最好唔好啦！』」
網民嘅嘲笑聲更係源源不絕，好似「Boris Wong」就話：「我民調投咗幾次票叫佢哋走又死都要留，家下（吓）畀（俾）人炒就話會辭職，就好似老闆見你做唔掂，費事封reference letter寫解僱咪勸你走，然後你唔走咪炒你，點知你話俾人炒就遞信？睇吓有冇老闆肯？」
「PY Tam」就叫「飯民」有骨氣啲：「係就明天全體辭職，吾（唔）好等中央炒魷（魚）咁肉酸，做人要有骨氣！」「Ld Keung Cheng」就回應：「民意話總辭都諗籍（藉）口賴死唔走，已經厚顏無恥夠肉酸，再肉酸多幾次冇所謂啦！」「Bill Ip」亦話：「守護糧支，戰到最後一秒！」
尹兆堅被回帶中回力鏢
網絡仲瘋傳民主黨議員尹兆堅喺2017年facebook發帖話不認同所謂「總辭」做法，仲鬧鼓吹「總辭」嘅韓連山及黃毓民「×街」，「韓連山、黃毓民你哋×街啦，叫人總辭，鬼。DQ議員話最大影響係乜先？係分組否決權同1/3議席否決權呀。而（??）家6個都咁大鑊，仲要總辭畀建制予取予攜？23條、議事規則、一地兩檢......乜都畀建制過晒？咩嘢邏輯？講『總辭』的要不政治幼稚病，要不是鬼。韓、黃就係鬼」，等等，咪即係打返呢班攬炒派議員嘅臉。 ■香港文匯報記者 雨航