■苑瓊丹疫市開檔做老闆。香港文匯報訊（記者 李思穎）苑瓊丹（苑仔）在香港開電視的工作告一段落後，諗頭多多的她決意向飲食界進軍，投資7位數字大量生產即食餸包，期望成為圈中「食神」，順便益老公大飽口福，但就遭老公拒絕出鏡宣傳，只肯做「試食」大軍。
苑仔透露出餸包的概念源於拍檔教路，因有感香港父母都好忙，收工還要煮餸好辛苦，所以膽粗粗投資，「自己對煮餸一竅不通，但我識食好嘢，所以便負責品質管理，唔好食唔會畀佢賣。」
苑仔坦言老公每晚「粗茶淡飯」，於是決定進軍飲食業：「因為我工人姐姐完全唔識煮餸，邊個餸老公話好食，佢就晚晚煮畀佢食，可以食足成星期，難得老公竟然冇投訴照食，再唔係就咁煮個上海麵又當一餐！因為呢個工人姐姐好錫狗，所以我又唔會炒佢，但係咁唔係辦法嘛，所以買啲即食餸包看門口，老公就話既然係咁，做咩唔自己投資？現在咪慳返啲買餸錢，又可以畀老公食餐好，總之『一為神功、二為弟子』啦。」
苑仔講笑話享受賺錢過程，歡迎任何人約她投資：「我冇乜錢咋，但想搵錢就真嘅，現在晚晚用餸包開飯，叫老公順手試味畀意見，不過佢死都唔肯出鏡幫手做宣傳，佢話我做『食神』，我就話佢係『賭神』夠晒神秘！」