●左起：胡鴻鈞、何依婷、羅天宇出席新劇宣傳活動。香港文匯報訊（記者 梁靜儀）胡鴻鈞、何依婷、羅天宇、米雪、石修、林穎彤、伍富橋及余德丞等昨日出席《十月初五的月光》 拜神儀式，飾演初哥哥的胡鴻鈞右腳受傷要撐枴杖到場。原來他誤踩水氹傷腳，而何依婷因過度關心，更引起胡鴻鈞不耐煩。
胡鴻鈞講述受傷經過：「我好低B，前日喺流浮山拍外景，行返化妝間時因環境較黑，不慎踩落水氹，當時聽到『啪』一聲都心知不妙，之後繼續行返化妝間，坐低後就開始痛，工作人員幫我敷冰，之後送去醫院睇醫生，醫生話我骨裂，叮囑我要少郁動多休息。」 問到可有影響拍攝進度？他表示劇組很好，先調拍他的文戲，他笑說：「我淨係上半身做戲，下半身好少用，不過自己好腰好腎好男人。」
身旁的何依婷就插口說：「唔知佢下半身有冇用喎，未傾到啲咁深入嘅話題，（有冇慰問胡鴻鈞？）我知道佢受傷即全程keep住發信息追問佢嘅情況，問咗幾個鐘，問到佢煩，仲問我：『你問夠未？』」胡鴻鈞笑指她其實是怕他受傷會影響通告，並笑說：「對唔住，我會快啲好返。」
說到有張智霖及佘詩曼珠玉在前，他們可擔心有比較？二人直言有壓力，胡鴻鈞說：「 壓力一定有，盡量做自己嘅版本， 加咗自己新嘅性格。」何依婷則說：「 壓力係要同胡鴻鈞前輩開工，佢轉數好快，我唔夠佢鬥嘴，我有睇返20年前個版本，希望搵到對比，加入自己啲新元素。」
林穎彤伍富橋續前緣
「緋聞情侶」林穎彤和伍富橋在劇中會展開一段可歌可泣的愛情故事，二人在台上更笑言會互相追蹤返對方的IG。林穎彤表示很開心及榮幸能飾演「汪海林」這個經典角色，並恭喜伍富橋可以跟她合作。問到再次合作可感尷尬？她說：「雖然大家已有三四個月冇聯絡，但再合作都冇尷尬。」伍富橋就聲稱之前是因為一起出歌才多聯絡。
問到二人劇中多不多親熱戲？林穎彤直言很多：「會有咀有攬，劇中講我被伍富橋傷害，我不想咁快抽離角色，所以打算拍完套劇，等佢追蹤我 （IG），我至追蹤返佢。」伍富橋就笑稱於拜神儀式後才追蹤林穎彤，想擇個吉時。劇集開拍已有一段時間，問到二人今次合作後可有機會做回好朋友？林穎彤帶笑說：「畀啲時間我哋又再了解一下先，劇中我一時慘一時好甜蜜，就快精神分裂。」
余德丞強調身體健康
余德丞於兩年前踢波期間暈倒送院，幸好最後無事，直至近日他為足球節目擔任主持，被網民發現他面容沒精打采兼眼袋浮腫，又不斷「食螺絲」，不少網民擔心他的身體再出事，紛紛留言叮囑他小心身體。
昨日余德丞亦出席拜神活動，劇中客串演出年輕版祝展輝的他，強調目前身體狀況良好：「我都有同公司溝通過，希望拍返多啲劇集，所以最近幾套劇都由客串做起， 之前客串咗《把關者們》。（會唔會擔心身體狀況？ ）大家唔好再作無謂揣測，事實上身體冇事。」他又透露：「最近都有跑步，醫生都話我可以安心拍劇同做運動，而黑眼圈其實因為細個嘅時候有哮喘，加上血液唔流通，所以咁多年來都有黑眼圈，我輸在起跑線， （可擔心俾人定型你是潺仔？ ）都怕定型，總之身體狀況絕對可以應付到工作。」