面對逆境，黃絲嘅阿Q精神真係好值得大家「學習」。話說好多黃絲近日移民英國後都變咗失業流民，人生路不熟嘅情況下自然經濟同心理壓力都大增。網名「半桶水C9」嘅黃絲近日就拍片大呻移居英國後嘅辛酸史，仲喊住「鼓勵」其他準備移民嘅朋友，叫大家相信自己一定捱得過呢啲辛酸日子喎。不過，呢啲說話由差啲喊到個妝都溶埋嘅岏縞X嚟，似乎冇咩說服力喎。
英國政府早前推出所謂BNO「5+1」入籍政策，唔少追求「民主自由」嘅黃絲幾乎冇點考慮就紛紛衝去英國，結果到埗後當然喊到收唔到聲。「半桶水C9」近日就喺YouTube上載影片，大呻自己好掛住香港呢個屋企，仲反問點解自己喺香港嘅生活咁安穩都要走咗去英國，特別係疫情下嘅英國除咗超市外，好多舖頭都唔開門，搞到佢冇得靠買嘢嚟減壓。真係聽到都戥佢覺得辛苦呀！
「半桶水C9」仲話，嚟咗英國3個月，佢老公試過一星期內見咗10份工但都冇人請，所以唔止失望同灰心，仲要慳得一蚊得一蚊。佢又話，雖然唔少仲喺香港嘅朋友都話英國好安全，又可以呼吸自由嘅空氣，但由於佢始終唔係喺英國長大，所以真係適應得好辛苦。
不過，「半桶水C9」都唔係不斷放負，反而以身作則教大家要積極面對，例如可以用花同香薰改變屋企嘅氣場，以便引發更多正能量，佢又叫準備移民嘅朋友要有心理準備，仲喊住叫大家千祈唔好放棄??。
呢啲經歷聽落真係好可憐，但網民似乎都不為所動，「Frankie Szeto」睇完反而仲火滾：「又要懶（慳）得一蚊得一蚊，又要想retail therapy（購物療法）......掛咩住屋企？英國咪係屋企！」「Bianca Kesh」就話：「（事主）負到一個點......佢真係要諗吓點解自己喺呢度......條路自己揀，冇諗清楚㗎咩，郁d（啲）嗌home sick」「Ben Tams」更加完全唔同情：「佢係咪演藝學院畢業？」 ●香港文匯報記者 雨航