● 右起：鄭俊弘、薛家燕、譚嘉儀及曹永廉。香港文匯報訊（記者 梁靜儀）薛家燕、鄭俊弘、曹永廉、譚嘉儀、JW王灝兒及泳兒等，前晚錄影《流行經典50年》，日前完成強檢的家燕姐前晚復工，她笑言因強檢新聞被廣泛報道，現在令她最頭痛的是住址曝光。她又表示待《流行經典50年》播完後，便好好休息準備做嫲嫲。
家燕姐提到當晚知道住所被圍封感到很愕然，她說：「因為突然見到好多警車同埋醫護人員，原來全部都要封路，因為嗰區有10幾單確診個案，可能擔心傳播出去，嗰晚有好多個着晒防護衣嘅人逐家逐戶進行登記，我哋做晒檢測都已經半夜1點半，（可擔心自己有事？）唔擔心，因平日有食好多產品增強身體免疫力，到第二日朝早8、9點收到通知話冇事，成個人都安樂晒。」她謂為怕有事影響工作，所以同電台方面講了之後兩日都唔會出街，會留在屋企做zoom直播，而原定檢測後要拍攝一個跟韓國合作的MV，她亦主動提出改期。家燕姐又稱估不到今次自己強檢的消息，連英國都有報道，令到她十分頭痛：「𠵱家最頭痛就係個個都知我住邊，啲人問我究竟搬唔搬，（會唔會搬？）邊有錢搬？」
新抱5月臨盆 準備做嫲嫲
對於《流行經典50年》進入倒數階段，主持了該節目4年的家燕姐坦言一定會依依不捨，她說：「我呢3、4年真係做到冇停手，集集都要唱歌跳舞都好攰，我好多謝上來節目嘅百位嘉賓歌手， 見好就收都係好事嚟嘅，其實畀新一代嘅歌手上節目唱歌都係好嘅。」問到家燕姐最後一集邀請哪些嘉賓？她表示暫時不可透露，不論曾經上過節目或是甚少上節目的嘉賓她都想邀請，而該集將會加碼播出個半小時。家燕姐又開心表示新抱將於5月臨盆，她會趁這段時間讓自己好好休息準備做嫲嫲。
另外，擔任了《流》主持已2年的鄭俊弘（Fred），對於節目進入倒數階段亦感不捨，他說：「呢個節目其實都帶畀大家好多歡樂，同埋好多難忘嘅回憶，自己最初唔識做主持，都係靠死背稿，喺修哥（胡楓）同家燕姐身上學到好多，又會經常聽到家燕姐講到昔日往事，都係好難忘。」問到他的未來動向，Fred透露4月將會開拍新劇，日後都希望拍劇及唱歌兩邊兼顧。問到他會簽哪家唱片公司？他笑說：「同新公司嘅合約已傾得七七八八，稍後便會公布。」
經常亮相該節目的泳兒，對於節目即將告一段落，並將由《勁歌金曲》取代，泳兒說：「我都好唔捨得，作為歌手有機會上音樂節目唱歌都是開心嘅，只要有音樂節目，我都會參與支持。」當晚選唱快歌的她，自爆因服裝比較鬆身，擔心大動作時會走光，因此跳舞時亦不敢郁動太多。