●李煒林發帖宣布退出公民黨。李煒林fb截圖公民黨近年涉嫌勾結外國勢力，更喺去年參與及組織違法「35+初選」，多名前成員更被控串謀顛覆國家政權罪，令唔少黨員爭相退黨保平安。原本今屆區議會，公民黨最高峰有成33席，不過，計埋觀塘區議員李煒林噚日宣布退出公民黨，令該黨已經喺過去9個月冇咗12席，大減36%。有網民話：「又一件（退黨），亡黨不遠！」
李煒林噚日喺facebook發帖話：「本人經過慎重考慮後決定退出公民黨，在此感謝黨過去幾年的支援和提攜。作為議員，我會一如既往著（着）力專注經濟民生地區議題，為麗港城社區和香港作出貢獻。」
見到李煒林退黨但唔辭職，fb專頁「BlueBase」發帖揶揄：「文中意味著（着）李煒林退黨保平安，選擇了糧支，繼續做地區工作，黑暴『手足』們所謂的『良知』已經消失了。」
「BlueBase」又指出，觀塘區議會原有嘅4名公民黨議員中，畢東尼、李軍澤、李煒林等人早前已分別宣布退黨或退出香港政壇，令網民猜測剩低嘅王嘉盈會唔會跟埋一齊退黨。
網民譏公民黨成負資產
唔少網民就覺得醒目嘅都知呢個黨籍係負累。「許榮炎」話：「公民黨成政治嘍囉負資產。」「Myron Lai」就寸李煒林：「醒目仔。」「Tang Kin Choi Peter」話：「糧支緊要d（啲）。」「Anthony Leung」形容：「退黨保平安囉！」
亦有「手足」自然鬧爆李煒林冇義氣。「Kam Man Timothy Leung」話：「是否大難臨頭各自飛？」「Kings Cheung」狠批：「又多一條反骨仔。」「Kevin Leung」質問：「點對得住班『手足』呀？」
其實，係得班所謂「手足」先會對呢啲攬炒政棍抱有幻想之嘛，「手足」對唔少區議員而言都只係上位工具啫。
李嘉達辭任觀塘區員
另外，涉及違法「初選」案、正被還柙的觀塘區議員李嘉達已辭任區議員。觀塘區議會主席蔡澤鴻表示，昨日接獲民政專員通知，李嘉達已遞交辭職信並正式離任。 ●香港文匯報記者 黃書蘭
訟黨區員退黨潮
2020年
7月31日 深水埗區議會副主席伍月蘭宣布退出
10月19日 沙田區議員陳諾恒宣布退出
12月11日 葵青區議員譚家浚、冼豪輝宣布退出
12月12日 南區區議員俞竣晞宣布退出
12月15日 東區區議員鄭達鴻宣布退出
2021年
3月 荃灣區議員黃家華退出
3月3日 東區區議員李予信在「串謀顛覆國家政權罪」一案的保釋申請聆訊中，宣布退出
3月16日 黃大仙區議員鄭文杰退出
4月12日 觀塘區議員畢東尼宣布辭任區議員，於6月1日生效，並退出香港政壇
4月13日 觀塘區議員李軍澤宣布退出
4月19日 觀塘區議員李煒林宣布退出
資料來源：香港文匯報資料庫 整理：香港文匯報記者 黃書蘭