香港文匯報訊（記者 李思穎）田啟文（田雞）為楊盼盼主持的《盼你賞面》擔任嘉賓，並品嚐盼盼姐親自炮製的上海菜「獅子頭」。田雞邊吃邊話當年，自小對娛樂圈事業充滿熱誠的他，為了入行，小時學習蔡李佛拳，希望多一門手藝能加入娛樂圈，他自言是武林高手：「嗰時喺天台練，個心成日以為自己得，覺得練過功夫係咪會易啲入行，但入行後，一拍動作戲就受傷，就知呢行飯（動作演員）唔係咁啱自己食。其實我現在覺得動作演員人工太平，唔夠睇跌打，個個動作演員都做到五勞七傷，所以我特別尊重他們，用動作去賺呢口飯。」
田雞續說，入行首份工是在電視台當臨時演員，但屋企人並不支持：「佢哋覺得娛樂圈唔啱我，話我冇過人之處，會好擔心，但我要加入娛樂圈，所以同屋企人反晒面，佢哋仲話『到冇嘢撈你就知』，點知不幸畀佢哋講中，有一段時間冇工開，去到山窮水盡、用光積蓄，唯有去搵普通工，點知見工日，收到電話話請我做『看景』，看住拍攝嘅場景。」田雞在做臨時演員時，有次令他體會深刻：「有日見到個黑白片時代嘅主角，但現則淪為配角，於是我心諗『主角唔代表一世都係主角，會有被淘汰嘅時候』所以就開始有危機感，一定要自我增值；另一次危機感出現，就係跟住周星馳，嗰時好多人都會話係跟住周星馳嘅田雞，但嗰時我諗『萬一佢退休唔做又會點呢？』，好居安思危。」