五十四歲老將巫斯義（圖穿綵衣），上季起重返法國揾食，在祖家高水平賽事面對一班同鄉，一樣硬淨企得住，殿堂級人馬真係唔係浪得虛名。老巫返國發展，支持就唔算多，不過只要有好馬在手，佢都唔會錯過展現功架機會，今個新馬季更加頻頻贏級際賽，喺上星期一隆尚舉行嘅一級賽聖安利爾錦標大賽日，雖然呢場重頭戲，老巫嘅坐騎就係陪跑，但當日佢起咗個孖，分別憑Bubble Gift贏二級賽奧卡魯錦標，另再以冷門馬「狂暴沙風」，擊敗杜拜世界盃季軍「賽車城」，勝出表列賽蒙特錦標。以巫斯義喺今個新馬季開個靚頭，上月做替工為「實勁力達」贏二級賽夏葛特錦標，早前遠征德國為老友薛寶力贏碧蒂巴克萊錦標，如今繼續有得威，且看他在今夏嘅歐洲頂級賽事，能否再嚐一級賽頭馬滋味。
馬會同廣州市政府就發展粵港澳大灣區賽馬產業簽署合作框架協議，馬會落實喺二○二五年喺廣州從化訓練基地安排常規性賽事，正考慮將一啲國際分級賽安排喺從化上演。廣州從化訓練基地自啟用以嚟，主要用途都係訓練馬匹，之前舉辦過一次示範賽日，安排本地現役馬同騎師參與幾場賽事，模擬本港跑馬實況。當時示範賽不接受投注，亦特別將賽事情況延後轉播返港，避免有其他非法渠道受注。其實馬會勞師動眾攪示範賽，一來想比外界睇吓從化訓練場嘅豪裝設施，更重要係為將來喺從化跑真馬預演。本來馬會準備一季安排兩次從化示範賽，但因疫情關係一直未能再舉行。今次喺粵港兩地政府見證下達成合作協議，馬會正式獲得內地官方授權辦正式嘅常規賽事。據馬會行政總裁應家柏披露，初步準備二○二五年時會撥出四個賽日喺從化舉行。現階段馬會重要起公眾看台等硬件設施，為從化訓練場加入馬場嘅弁遄C如無意外呢四個賽日都會即時轉播返香港。近年內地好多省市都想發展賽馬產業，好似青島及海南早前傳過會起馬場，但喺種種原因下都未見實質進展。香港馬會係國際知名品牌，收益撥歸社會慈善事務，呢個係一個好大優勢。內地開放發展賽馬產業，首先揀馬會合作可以話順理成章，連同相連嘅育馬等產業可以開拓經濟創造就業，發展潛力將更加大。