 放大圖片
【本報訊】（記者 植毅儀番禺直擊）將於大年三十晚播出的《羊城賀歲萬家歡》前晚在番禺麗江明珠歌舞劇院進行錄影，當晚司儀包括汪明荃、夏雨、陳芷菁等。這節目分別於1979年、1989年及今年三次與廣東電視台聯手製作，適逢30年前汪明荃及夏雨亦有參與，大會更播出當年兩人合作片段，阿姐及夏記均感觸良多，互相輕拍對方肩頭。
相隔30年再做同一節目，夏雨表示心情激動，笑言自己當年很清瘦，現在就很穩重。30年前自己原本怕接當日的表演，因為自己62年偷渡來港，相隔17年未返過廣州，怕返去會再不能回港：「那時公司話冇問題，我才接個job。成17年冇見過阿媽，個個同事都幫我帶D好嘢返去，印象十分深刻。今次公司再叫我做，我即刻推晒其他工作。（過年有咩做？）老婆仔女全部返來香港，過完年才走。」
新年願望：新光續約
汪明荃前晚先穿上粉紅色裙任司儀，唱壓軸時換上火紅旗袍。慶功宴上，阿姐表示唱壓軸時有少少「甩嘴」，要補錄少少。說到30年前對廣州的印象，她表示當時好多單車，現在再來廣州，變化十分大，改革開放30年好成功。看回30年前的片段，笑言當時好年輕、好靚。她又表示年初一會回公司同阿sir（邵逸夫）𦱾利是，新年願望是希望新光續約問題盡快解決。
阿姐勞氣地說：「個業主實際想加幾多，又唔開個價，現在戲班都停咗，唔敢到其他地方租場，因為一租場就要畀訂，個個都想可以繼續在新光演出，因為是賣座的保證。政府對粵劇一點都唔重視，粵劇係本地文化，政府都唔救，我真係無晒心機了。」
王君馨共舞不慎滑倒
前晚表演的名人、藝人包括羅家英、黃宗澤、湯盈盈、張敬軒、陳偉霆、孫耀威及跳水冠軍胡佳等，其中張敬軒打頭陣出場唱出一曲《曝光》，軒仔媽咪亦現身會場，為愛兒打氣，當TVB藝人表演《2009漫遊太空》時，王君馨與黃長興跳完鬥牛舞，再跳CHA CHA時，不慎踩到之前的鬥牛布，滑倒在地，事後王君馨表示膝頭瘀了一大片。她說：「長興事後不斷Say sorry，其實唔關佢事，因為我們跳完鬥牛舞，布已經放在一邊，係我再跳CHA CHA時，邊跳邊退後，唔記得有布効度，其實只係跌一跌，好快就起番身。（你反應都好快呀？）哈哈，身手敏捷，不過膝頭瘀咗。」
陳偉霆不忍同事被裁
陳偉霆唱《GEEAT TIME》時，亦被舞蹈員踢走了咪，他表示到內地登台「蝦碌嘢」時有發生。對於公司裁員一事，他就表示是有適當的人手調配，自己的工作則沒有影響，工作已經排到3月：「我前幾日同個同事傾電話，大家傾到喊，合作咗5年，好唔捨得。不過經濟差，少不免，自己工作冇影響。（新年有咩做？）第一日返公司𦱾利是，自己則準備5位數字派利是。」
|
放大圖片
