|
李自明
香港近來因一群激進憤青屢次衝擊法律底線，而出現所謂「80後」的驚奇現象：後生仔血氣方剛，視法治為障礙，以挑戰為快，搞到政壇「立立亂」。政壇老友對這班80後的行為舉止雖不認同，但直言年輕人對社會有所不滿，有時行為略為過火也尚算可以理解，只是白鴿黨「李登輝」（李柱銘）竟私下籌組大狀團，為80後撐腰，就真令老友百思不得其解：「馬丁李平素大叫法治萬歲，如今明知班後生仔一係踩界，一係已經違法，才會遭警方起訴，卻仍組織大狀團話要幫班後生仔打官司，咁樣豈不是變相鼓勵違法行為，視法律為無物？」老友坦言，馬丁所為「明撐實靠害」：「簡直係設個陷阱畀班後生仔去踩，以為自己可以任意妄為，有恃無恐。」
政界老友嘆言，年輕人容易受鼓動，尤其是一眾反對派的激進「粉絲」，本就近乎迷信地盲目支持癲民黨（公社連）大搞五區劈炮，有的輕則以「瞓街」、「掟鞋」、粗言穢語來表達訴求，有的乾脆衝擊防線，與警員大爆激烈肢體衝突，增加社會不穩的隱憂，凡此實為普羅大眾所不樂見：「特區政府當然要好好思考80後現象背後所反映的社會問題，多聆聽後生仔的聲音，並予以理性疏導，反對派同樣亦應擔起社會責任，不應動輒鼓動後生仔採取激烈行動。」
美化激進行為催眠後生仔
但聽過馬丁一番「撐80後」的偉論，老友直情「流晒冷汗」：「都唔知馬丁係幫人定害人，幫後生仔打官司，好聽啲講叫支持、backup，難聽啲講係煽動，鼓勵班後生仔知法犯法，而且無所顧忌。」老友坦言：「馬丁今次讚到班後生仔飛起，個個都飄飄然以為自己的所作所為真係完全正確，就算有咩事，都有『民主教父』無限量照住，結果佢哋梗係會做到更激，行到更偏，去到更盡，咁仲唔係靠害？仲唔係攞班後生仔嚟玩？」
政壇老友也坦言，做得反對派幕後黑手，馬丁李「賣黨」之名早已天下皆知，黨內搞到白鴿黨人「檯都反埋咁滯」，黨外亦與四人幫一起大肆搞風搞雨，把公文袋一舉推入「公投」無底深淵，分分鐘「屍骨無存」、「人散黨亡」。前車可鑑，老友直說：「馬丁年紀一大把，不知修心養性，卻姣婆守唔到寡，成日挑撥是非、撩是鬥非，無非都是想繼續享受効政界翻雲覆雨嘅優越感，但呢次佢唔玩黨友，卻靠害班後生仔，美其名大讚80後嘅行動係新民主運動，實則又係賣吓口乖，吸引班激進憤青注意，藉以延續自己『民主教父』嘅影響力之嘛。」
低成本煽動爛頭卒搞政府
他坦言，馬丁李已是政壇的「明日黃花」，當然「玩得起」：「反正効前面衝鋒陷陣嘅又唔係佢，而係班後生仔，佢同班大狀得閒幫個忙上吓庭，打吓官司，又唔會上身，又可以借班後生仔來玩吓政府，何樂而不為？所以咪可以講到好口響囉！但班後生仔真係要諗清楚、睇清楚，唔好咁易畀人賣咗豬仔。」
|
