|
李自明
政治之所以好玩，在乎局勢瞬息萬變，局中人各自執迷，總未能掌握全貌。最愛冷眼旁觀的政壇老友早前為自明仔細解構了公文袋和癲狗幫的「死亡之路」，忽聞有前癲狗幫成員組成「憤青二人組」出來「搞搞震，選埋一份」，字裡行間在在表露出對癲民黨的不屑，不禁哈哈笑言：「癲民黨此番真的氣數將盡了！」他直言，一眾憤青全是「甩繩馬騮」，絕非癲狗幫所能駕馭，「彩虹Ken」（張錦雄）與「鬍鬚鴻」（李世鴻）作為當中的激進代表，兼有不受控制的示威常客陳巧文助陣，足證「野馬已經脫韁」：「二人組參選，既挖走癲狗幫的激進票源，亦用行動講明了對癲民黨的不滿！」
以為勝算十足 未料群魔攪局
癲民黨策動劈炮運動，本就各有盤算，如今卻人算不如天算，引來一眾奇人加入戰團，一時間「群魔亂舞」，好不熱鬧。「騎呢」選戰一觸即發，既令所謂「公投」淪為政壇笑料，亦暴露了激進反對派互不相讓、各自為謀的「爆笑內亂之局」。
早已預言癲民黨「自取滅亡」的政壇高人笑說，癲狗幫以為唯我獨尊，可以盡攬憤青票源，結果卻被憤青「二人組」徹底地擺了一道：「你以為可以扮阿哥、做大佬，人哋即刻擺明車馬搶憤青票，癲狗幫唔驚就假啦！」
高人坦言，先有「疑似癲狗幫B隊」的大專2012「攪局」，再有憤青二人組撩起火頭，癲民黨的票源可謂一再被分薄：「雖然大家都會覺得呢班o靚仔威脅性不大，未致於能夠搶灘成功，教癲民黨5個辭職議員真係含着一把傷心淚，落車一鞠躬，但o靚仔空群而出所帶出的其中一個訊息，卻十分值得玩味。」
煽動憤青「獨立」 破癲狗幫根基
他解釋：「學生隊唔受政黨玩的講法有幾分可信先放下不論，憤青二人組就已經講明要吸納對狂郁人及癲狗幫有意見的朋友，以及80後青年朋友的選票，呼籲年輕人毋須慣性擁戴大佬或等他們指揮，又話沒有大哥支持的新青年運動才更堅實有力；呢啲說話句句有骨，字字有刺，即係話『搵食行遠啲啦老嘢』，擺明班o靚仔拒絕，唔受你（癲民黨）點啦！」
癲民黨玩「公投」不得人心，已有民調結果為證，毋庸多論，政壇高人直言，公文袋和癲狗幫的「氣數」如今已至窮途末路之境：「公文袋忽然激進，流失溫和中產票源又無法吸納激進票源是政治自殺，癲狗幫沾沾自喜，以為一舉得米則是政治幼稚。今日你玩人，他日人玩你，政治就係咁弔詭。如今憤青組隊出戰，顯示癲狗幫的基本盤已經動搖，真正嘅激進憤青根本唔聽佢支笛，自己有自己玩，呢班甩繩馬騮先係癲狗幫最尾大不掉嘅麻煩。」
所謂「成也蕭何，敗也蕭何」，高人笑言，此正好用以形容當前癲民黨的困局：「公文袋已經是肉隨砧板上，而癲狗幫出位靠的是這批憤青，最怕嘅都係呢批憤青！佢哋完全不按牌理出牌，最後一定將癲民黨逼埋牆角，搞到你進也不能，退也不得，激怕出事，退怕失票，仲唔步步進退失據，鬼打鬼亂晒章法。咁嘅好戲，你話唔睇點得？」
|
