|
李自明
癲民黨逆民意策動的劈炮行動飽受批評和冷待，兩黨搞手心勞力拙聲勢如江河日下，為催谷人氣，遂於昨日舉辦一次「爭取真普選」的「黃衣遊街」，並在遊街前預先做好期望管理，刻意以「阿爺打壓」甚至「空氣污染」等匪夷所思的借口，為遊街人數訂定低期望值，以期在遊行結束後再憑其利嘴伶牙隨意演繹有關數據，發揮其翻手為雲覆手為雨的政客本色。誰料人算難敵民意，昨日遊街者只得約千人，只及癲民兩黨預期的1/3，可謂貽笑大方，他們的「政治彈弓手」亦頓失用武之地。
遊行前自降期望 預測參與僅3千
政壇老友向自明坦言，猶記得癲民黨對由盲煮動力主辦、白鴿黨主導的「元旦大遊行」冷嘲熱諷，大肆散布「遊行冇用論」，但眼見多番折騰下「公投」仍然缺乏生氣，境況直如垂死掙扎，遂不惜以今日的我打倒昨日的我，妄圖搞一次「七一遊行」式的黃衣遊街，而主催者公文袋黨魁阿豬余在宣布有關消息時，已先自降期望，預測昨日參與遊街者只有約3,000人，人數僅為元旦遊行的1/3。
老友笑說，如果有人聽見阿豬余此言，就以為癲民黨終於醒悟自己所作所為不得民心，那就「太天真太傻了」，因為這只是兩黨又一次使出「彈弓手」而已：「你睇由『公投運動』開始，佢哋的立場幾咁千變萬化？一時話自己爭取的係『2012年特首和全部立法會議席都由1人1票選出』，一時就改口提出冇確切時限、冇確切形式的『真普選』，最近就剩係掛住攻擊同醜化功能界別；最初話自己係『變相公投』，跟住又自行升呢話係『起義』甚至『解放香港』，轉頭又話『起義』、『解放』只係宣傳口號，叫人唔好當真！」
「政治彈弓手」低劣 空污亦作藉口
他坦言，癲民黨立場五時花六時變，說到底，只是兩黨中人不斷顯示他們完全是以「市場導向」，見勢色不對就改變立場的投機取巧本色而已：「就好似近排一啲o靚模咁樣，唔想再賣身材走去賣弄自己貧乏的演技，結果大家反應唔好，於是就即刻打返條『事業線』出嚟，都係同一道理啫！」
因此，阿豬余認低威，預告黃衣遊街人數只得3,000，更學似荒謬鬧劇《大內密探靈靈狗》般搞爛GAG，聲言本港空氣污染嚴重，會打擊市民遊街的意慾云，老友笑言，「政治彈弓手」出到如此拙劣，可謂黔驢技窮至極。
老友說：「阿豬余的手法，根本係一開始估少啲，等遊街者多過3,000人，就可以名副其實high到好似食咗LSD（弗得）咁，好風騷咁講『結果令人喜出望外』，甚至為低估支持『公投』的市民數目而公開『道歉』，咁就夠晒戲劇效果嘞；如果今次黃衣遊街人丁單薄，癲民黨亦可以賴地硬，賴天氣，甚至由佢哋的友好傳媒出口，再一次話『數百萬人在心中默默遊行』，甚至再創新猷話『全宇宙數十兆人在心中默默支持』囉！」
不過，昨日參與黃衣遊街者竟不足1,000人，人數之少肯定是癲民黨始料不及，令兩黨領導「冇晒癮」。他笑說：「你幾時睇過由癲民黨搞的遊行，到遊行完畢時唔搞嘢𡦃？起碼都好似以前咁，効政府總部舌累地，或者轉去中聯辦搞搞震啦，但今次竟然咁順攤，話散就散，肯定係癲民兩黨領導見遊行人數少到冇晒心機，求其搞完就算數啦！」
人數少到離譜 兩黨領導冇晒心機
雖然當頭棒喝，還得看悟性如何。老友嘆道：「所謂『佛祖拈花，迦葉微笑』，講嘅係一個『悟』字。癲民黨自大搞『公投』以來，民望插水，但兩黨黨內領導就繼續大唱王菲的《執迷不悔》，就知道佢幾咁抗拒悟性啦，就算今次遊行人數少，佢哋一定會自圓其說，繼續自我感覺良好，所以癲民黨尤其係公文袋中人好應該的起心肝諗一諗，係咪由得黨大佬繼續盲人騎瞎馬，最終一失足成千古恨，定係急急腳勸佢哋回頭是岸，唔好再自己呃自己，以免成個黨陪葬啦！」
|
