 放大圖片
■文：亞里安
去年James Wan一連兩套恐怖鬼片先後登場，《詭屋驚凶實錄》似乎贏得不少影迷歡心，人人睇完驚魂未定，筆者卻有所保留，略嫌鬼屋故事驚喜一般，反觀較少人熱話的《兒凶續集》則更有睇頭，在任何續集電影都例必大失所望的前提下，慶幸尚有一些意外收穫。
2011年，《兒凶》擺明向《鬼屋》及《鬼驅人》兩套經典翻新致敬，成功玩出old skool懷舊驚嚇新配方，今集主人翁林拔家庭繼續鬼纏身之餘，同時延伸《鬼驅人》家庭團結一心跟邪魔大鬥法的宗旨，行程同出一轍，由惡鬼捉小孩出發，到男主人鬼上身煽動家庭鬧不和，再到家人勇闖鬼域救愛兒，及靈媒師徒的二三事等，不難找到《鬼驅人》系列的影子。
當然，James Wan今次亦有引入東瀛鬼片的多層空間概念，劇情驚分三路，前段各自組件建構，後段陰陽大合體，現實世界有林拔一家鬼來襲，第二層是師徒明查暗防靈探鬼屋，第三層則屬主角Josh童年的靈異私藏陰間大真相，同步互動的戲魅迫人，甚至將《觸目驚心》及《不速之嚇》借屍還魂，再次見證James Wan是新一代鬼片王之位。
借兒童玩具來搞不寒而慄，一直是James Wan鬼片系列的殺手鐧，今次有失驚無神嘈醒你的BB車，媲美《鬼驅人續集》變奏版的拉線鐵罐電話，夜半無人琴音，懷舊收音機詭異聲響，投骰通靈的人問鬼答，小玩意大驚嚇，另外，還有「排排坐扮粉果」的死屍陣，及出櫃凶靈的埋身突襲，尖叫聲此起彼落，十足James Wan特製過山車一樣。
總之，如果錯過戲院的現場集睇哈佬喂，透過此藍光碟初嚐《兒凶續集》的話，都是那一句，在家睇James Wan鬼片，環迴音效鬼影重重之下，肯定比戲院驚嚇多倍。
|
放大圖片
