 放大圖片
■王馨平（左）與黎燕珊暢談愛情觀。
香港文匯報訊 王馨平亮相有線高清娛樂台愛情紀實節目《往事•並不如煙》，與主持黎燕珊暢談愛情觀。王馨平的父母在她5歲時離婚，媽媽林翠後來移民到美國生活，她和妹妹則跟隨爸爸王羽在台灣定居。王馨平大爆王羽感情事，指他離婚後仍有不少戀情：「印象中Daddy有好多女朋友，成日都會帶唔同Auntie返屋企。印象最深刻，都係後尾做咗我後母的Auntie，我同妹妹第一眼已經好鍾意佢，爸爸再婚之前都有問過我哋意見，我哋都係一致揀佢。佢對我哋幾姊妹非常好，視如己出，我一路都好感激佢畀咗好多母愛同溫暖我哋。」
為瞞父親吞情信落肚
王馨平指父親自小管教嚴格，更曾跟她說過交男朋友必須先得到他批准：「佢以前曾經講過，拍拖的話個男仔要過『三關』，第一關係要同佢打麻將，第二關係飲酒，第三關就係要同佢打架。細個時唔明佢點解會咁講，不過現在諗返都覺得幾有道理。以前我一定唔會同佢講拍拖，最記得我有次係房寫寫下情信，Daddy突然衝入來問我寫緊乜，情急之下我撕爛咗封信仲食埋落肚！點都唔畀佢知。」
入行後王馨平曾與鄭嘉穎交往，當時被外界封為金童玉女，不過有傳戀情遭王羽反對最終分手。王馨平坦言自小個性反叛，不可能被爸爸左右情感：「我同嘉穎件事隔咗咁耐，我都唔好意思再提。其實當時Daddy係唔支持我哋，因為我入行前佢要求過我唔可以同圈中人拍拖，不過感情事無人控制得到，Daddy都控制唔到我同邊個拍拖。雖然我同嘉穎分開咗，不過我哋到現在仲有見面。好多人會問我知唔知佢現在有無拍拖，我好少主動問佢感情事，不過上次同佢見面食飯，佢就答我無拍拖，仲叫我介紹女仔畀佢識。」
|
放大圖片
