■唐詩詠稱從來不會管另一半。香港文匯報訊（記者 梁靜儀）唐詩詠昨日穿上透視露背裙出席《去澳門．葡一葡：四式世界》旅遊活動，林盛斌則擔任司儀，近日詩詠的男友洪永城（Tony）被指與舊愛Bird Tse翻撻而激嬲她，事後Tony貼上與詩詠的合照證情未變，詩詠亦力撐男友只是正常社交。
詩詠接受訪問時，被問到男友是否已氹掂她？她說：「其實好小事，花邊新聞唔使咁緊張，（男友同舊愛見面可有向你提及？）佢有同我講去飲嘢。」有指此事激怒詩詠，買樓及結婚大計都要急煞停？詩詠強調一直都未有買樓結婚計劃。對於影到他們去睇樓，她笑稱其實他們是去散步。她否認識為此事而爆喊：「我自己都唔知？花邊新聞啫，都係正常社交，唔會問太多，（會否叫男友不再見舊愛？） 從來唔管另一半，一來辛苦自己，同埋要管另一男人，嗰段關係都唔會長久。（會否太自由？）呢個係我自己嘅方法，成年人知道自己做緊咩，唔會特別管，識尊重就得。」
拒評Bird是在挑機
說到Bird上載與Tony合照兼且加上心心圖案，可覺得對方在挑機？詩詠說： 「呢啲係佢哋圍內朋友嘅Inside Joke , no comment，唔識佢。」她又稱自己基本上是沒有看過該報道，所以沒有不開心。男友與前度親密合照，她又會否呷醋？她力撐男友說：「唔會，都係正常社交，飲吓嘢，（你會否跟舊愛見面？）自己無特別去做呢樣嘢，如果我有咁選擇，另一方都會尊重。（同舊愛有見面？）舊愛無約我，只係Whatsapp，都係好耐嗰啲就唔會喇。」
再問到她經過這次是否百分百信任男友？詩詠稍作猶疑才答：「大家唔使咁多揣測，唔使咁嚴重。」之前她被拍到與男友在銅鑼灣鬧交，問到是為了什麼事？ 詩詠否認兩人在鬧交：「只係自己唔笑就好似黑口黑面，加上當日有啲受驚，無諗過有咁多記者在場好愕然，一時反應唔來，係一個美麗的誤會，下次我會笑多啲，對唔住。」
詩詠與Tony拍拖也有一段日子，但有指男方未能融入她的朋友圈子，她的契哥馬國明更多次表明跟Tony不熟，更叮囑她要「睇定啲」，她說：「可能大家都係緊張我。」此時詩詠突然指眼睫毛入眼，要轉身整理，更笑說：「大家唔好以為我喊。」問到會否安排男友與一班朋友見面？詩詠表示未有機會，因不容易約到。訪問尾聲，詩詠向記者重申：「唔好寫我結婚喇！」