聯交所昨日出手嚴打「啤殼」，有市場人士呻今勻真係比翠如BB累死。此話怎解？事緣黃翠如父親黃永華旗下的聯旺集團(8217)，股價被炒上太空，又上市一個多月就發盈警，咁又點？話晒都係經過了聯交所及證監批准上市，大把創業板股份都係咁啦，怪只能怪翠如BB名氣太大，報紙大字標題，市場高度關注，認為有人做得太過張揚了，令到想「鬆張」的聯交所好難下台，結果要「做嘢」。
其實早在4月28日，證監會已經點名批評聯旺股權高度集中，指有19名股東合共持有2.5854億股該公司股份，相當於該公司已發行股本之20.72%，有關股權連同由該公司一名主要股東持有之9.36億股（佔已發行股份75%），相當於該公司於2016年4月19日已發行股份總額之95.72%。
第三板可能更難推出
今次監管機構相繼出手，「殼農」今後想「種殼」搵食又難咗，所以話，一切都係翠如BB的錯。經此一役，上市條件較創業板更鬆的「第三板」，可能更難推出，令「殼農」又少條財路，所以千錯萬錯都係翠如BB的錯。 ■記者 蔡競文