睇通睇透：祈普敦英雄出少年

微信掃一掃

香港賽馬經歷多年來的變遷，曾經在此搵食的騎師非常國際化，但以影響力嚟講，澳洲騎師佔有重要位置。二三十年前已經有狄克文、湯寶森、高慈及查汝誠，再近代有岳禮華、薄奇能、韋紀力、鄧迪、麥道朗、柏威廉及郭立基來港搵食，之後相隔一段時間，澳紐幫影響力減少，但近年又見再度崛起。近年以香港作為策騎基地的澳紐幫包括潘頓、羅理雅、柏寶及史卓豐，加上經常來港客串的貝湯美、布文與安國倫，呢股澳紐勢力在港重新發揮作用。新季紐西蘭冠軍寶遜獲發客串牌照，仲有新星祈普敦初試啼聲，可見目前真係粒粒皆星。

或者馬迷對此位廿二歲新紮師兄，澳洲騎師祈普敦比較陌生，其實此子曾經兩奪新南威爾斯冠軍見習騎師，上年更打入悉尼騎師榜前十名。祈普敦出道短短日子已經贏得超過三百五十場頭馬，近季更上一層樓，勝出率高達十一個巴仙，正所謂英雄出少年，以呢個比率計算，如在港發展勝出率已高過柏寶、郭能與田泰安，可以話係一粒超新星。展望新一個馬季，祈普敦來港客串，加上同聲同氣的潘頓、柏寶、羅理雅、史卓豐及寶遜，澳紐幫勢力必會坐大，尤其潘頓、羅理雅及史卓豐更是核心鐵三角，當中的無形連繫值得玩味，隨時可以抗衡獨當一面的雷神。

讀文匯報PDF版面