意大利雖然係非主流賽馬地區，但當地有育馬事業，但由於生產的馬匹數目並不足夠應付當地賽事，因此唯有從外地進口馬匹。超過半數參賽馬是非本地出生，像近年意大利打吡參戰馬之中，出賽有半數出生於英愛的。當地馬主通常會從其他歐洲國家購入周歲馬，尤其是產馬大國愛爾蘭及英國，皆因拍賣會規模較大，讓買家競投的馬匹數目多，即使出自炙手可熱的父系，周歲價通常亦只是幾萬英鎊，少於一百萬港元。而將來出賽後再轉手，身價隨時可以翻十倍，經濟效益相當高，在大幅削減賽事獎金的情況下，馬匹低買高賣的做法，亦不失為現時在意大利馬圈生存之道。對比於英國、愛爾蘭甚至法國，無可否認，意大利賽事的平均水準較低。不過，有個別馬匹亦擁有非凡質素，而牠們大部份都是出生於英國或愛爾蘭的。對於意大利馬，香港一眾練馬師中，似乎告東尼最情有獨鍾，近年不斷在這個歐洲二線賽馬國家搜羅良駒，面對英愛馬匹開天殺價，平靚正正是意大利馬吸引之處，近年成功例子包括香港經典一哩賽得主「美麗大師」（圖4號）、香港瓶亞軍「威利加數」等等，剛季亦有「華美之友」與「鴻圖飛星」交出好表現，尚有匹意大利打吡殿軍「將才」，告東尼手執此批意國兵團，新一季隨時又可在沙田馬場大肆進攻！
