■合照時，坤哥緊張得除下眼鏡抹汗。香港文匯報訊（記者 梁靜儀）吳業坤與黃心穎昨日到尖沙咀出席首飾活動，而心穎的胞姐黃心美則擔任司儀，坤哥更不時跟心穎叫心美做「家姐」，之後三人影合照時，坤哥更緊張得要除下眼鏡抹汗，十分搞笑。
心穎表示還是第一次與家姐同場出席活動，故有點緊張。她又謂爸爸及另外一位姐姐都有到場，問到是否叫爸爸即場買金器做嫁妝？心穎笑說： 「叫爸爸揀畀我呀。講笑啫，自己賺錢自己買，或者另一半買都OK，（家人可有買定嫁妝畀你？）冇，但自己第一隻鑽戒係大學畢業時爸爸送嘅，當時唔鍾意鑽石，但之後就鍾意。」問到可有收過男朋友送的鑽石？心穎說沒有收過，只收過頸鏈。問到分手後可有問她要回？她說：「咁又冇試過，如果要攞返就畀返佢，原來我睇錯人，咁斤斤計較。」
心穎又大爆剛才與家人影相時，坤哥說要一齊影，又跟她叫Daddy和家姐，被他嚇了一跳。坤哥即解釋：「我係想幫你揸相機啫，（為何跟心穎叫Daddy和家姐？）因為我睇到心穎個社交網同屋企人食飯嘅合照好sweet。」問到他覺得心穎如何？他坦白說： 「正呀，但只可做嘢，唔可以交心，因為自己未夠班。」心穎亦大讚坤哥是筍盤，又稱不介意姊弟戀。