早兩日選舉，大街小巷都係講緊呢個話題，原來馬圈中人，一班華籍騎師都好關心選舉情況，好似梁家俊、鄭雨滇及何澤堯都係住喺同一選區，佢哋唔係住喺馬鞍山就係烏溪沙，周日都有投票俾佢哋心目中嘅候選人，而梁家俊去投票前，周日已一早入馬房睇馬，佢第一時間入鄭俊偉個倉，搵副練王燦聲，原來佢想要「皇龍寶駒」最近三日食慾報告。點解呢隻五班馬令到梁家俊咁緊張，當然有佢嘅原因，話說呢隻馬由李易達馬房轉投鄭廄之後，經已跑咗兩季，兩季都仲未有頭馬交出，上季尾馬匹先至開始有番上名成績，當然落到五班，只要等狀態開始有復甦跡象，唔難會再有成績交出，而其中一仗谷草一哩，呢隻馬就係由梁家俊跑過一席第三名，頭二馬係「得意財星」同埋「快快贏」。其實呢場上名後，馬房搵過杜利萊騎過場泥地千八米，又係得第三名，今次馬房唔搵杜利萊，而一早卜定梁家俊，純粹因為呢隻馬負輕磅，而梁家俊今個暑期喺英國出賽，除保持身手之餘，更能喼住體重，所以答應得鄭俊偉咁爽，可以再替「皇龍寶駒」披甲。
講番呢隻「皇龍寶駒」，目前經已八歲，年紀都唔後生，今季係第六季在港上陣，之前咁多季，都係贏過一場谷草一哩，贏馬路程相當狹窄，馬房曾經喺上季想同呢隻馬轉型到其他路程謀功，例如泥地一哩及泥地千八米，但始終得位置交出，呢次列陣贏馬路程谷草一哩，主因係馬房見到呢隻老馬，季初狀態經已對晒辦，所以唔想喺其他路程打冇把握之仗，寧願一出就係角逐食胡路程。點樣見到呢隻老黃忠弗，就喺周六朝早，馬房安排呢隻馬同廄侶「君悅灣」及「好腳頭」拍跳千二米，只見「皇龍寶駒」戴上眼罩，由馬房助手試來火氣十足，呢類咁嘅老馬，難得季初有啖火，陣上自然會搏到盡。
