在香港作為超級大倉口，大摩歷來接受馬匹加盟或多或少都較嚴謹，就如年前馬會配售馬從新出土，大摩接收了「甜將」，最終由四班起步八捷贏上百二分，獎金逾千一萬。剛季他罕有地接手馬會拍賣會新馬「靚加加」及「美麗寶寶」，除了馬主財力因素，兩駒潛力可是吸引之處？記得上季「無敵飛龍」剛來港不久由蘇偉賢加盟大摩，未幾一出即勝，另一經典是「駿馬名駒」，在胡森旗下未上陣已加盟，至今九捷獎金近千六萬，可見練者之本事，自購馬之中，上季大摩還接收了「威力川」，此駒來港初期隸屬沈集成，未跑經已蟬過別枝。「威力川」抵港後跑過三仗，三戰俱屬田草千二米，獲得冠季軍各一，首次上陣即追入第三，翌仗換鄭雨滇末段發揮令人側目，到最後一仗贏馬開齋，在史卓豐胯下造出的總時間快至一分八秒○七，以大熱門身份姿態勝出，兼且刷新二班田草千二班際紀錄時間，盡顯非凡潛質，而且更係全季同程最快締速，新季雖然轉五歲，但由於連同澳洲，「威力川」只跑過十二仗，用得不多，估計仲有上升空間，今次雖然首次角逐谷草千二米，不過以牠能跟擅鬥之跑法，窄場相信更能展其所長。
方嘉柏上季暑期有七駒評四十分或以下，結果當中有五駒於上季能交出頭馬，餘下兩駒也有入位成績，反映此廄五班馬追得過。今個暑期此廄有九駒是在四十分或以下，當中「自動導航」、「通勝」、「齊齊健康」及「糖黐豆」過往都有贏馬紀錄，而「想贏就贏」、「全勝姿態」、「永恆光輝」及「事必獲利」也有上名成績，只有「金武士」是三零部隊。而今次谷草賽事，「全勝姿態」與「事必獲利」率先登場，前駒出戰千二米，後駒就角逐一六五○米。「全勝姿態」上季最後一戰落五班作賽立即上名，證明已找到支持位，今季轉四歲成熟程度會更佳，應該是問收成時候。「事必獲利」上季尾由蘇保羅馬房轉投方廄，賽過三戰，兩場田草就跑到無影，但出戰谷草千二米表現就相當搶眼，出閘早段唔夠快，轉彎仲要兜出大外疊，直路爆段全場最快拉士取得季軍而回，今次向一哩進軍，相信會適合發揮，呢一對方廄五班馬大家千祈咪錯過。