大難不死必有後福，蔣嘉琦又是一例，「真好漢」踏到他駒後蹄墮馬，好彩係人馬無恙，過多兩場就贏告東尼隻「萬事欣」，證明小妮子冇受墮馬影響。周日小妮子一早返到師父呂健威馬房與眾手足打牙骹，未幾葉楚航經已搵人通知蔣嘉琦，下午有時間就入倉睇「君子協定」教閘，倉主好識做，知道小妹墮完馬，即使冇事但始終要啲時間休息，非必要都唔搵佢親自仄馬，所以呢課馬房教閘，專登搵咗高級騎馬人余健誠代勞，嘉琦妹下午只係入倉睇住隻馬教閘，與在旁的葉楚航一齊觀察，睇馬匹狀態進展。據馬房手足透露，佢哋睇過呢課「君子協定」教閘，出入閘都非常順利，同上季有水準時係一模一樣。講開上季，呢隻「君子協定」經已由蔣嘉琦跑過兩次，呢兩次都係出戰谷草千二米，兩次都係得亞軍，一次輸俾雷神隻「好運有利」，另外一次輸俾史卓豐隻「金友寶」，呢兩隻馬跑四班都係超級貨色，「君子協定」輸過俾呢一對馬可以話雖敗猶榮。今次再度列陣谷草千二米，葉楚航一見到呂健威呢場冇馬報名，即刻向佢借將，呂健威見師兄弟份上，知道小妹搶手，葉楚航問到自然冇托手踭，而呢隻「君子協定」目前在港第四季上陣，頭兩季在港出賽均有頭馬交出，只係上季未贏過，呢季馬房咁緊張隻馬，希望可以及早喺季初建功，餘下日子一路數胡，補番上季冇頭馬交出之餘，更希望呢隻馬可以發揮出最佳水準，成為贏得頭馬最多嘅一季。