■張晉會於戲中同巴西裔美籍拳王（右）對打戲。香港文匯報訊（記者 梁靜儀）鄭嘉穎、張晉、劉心悠、周國賢、原子鏸及前UFC中量級冠軍的巴西裔美籍MMA格鬥家Anderson Silva昨日拍攝電影《九龍不敗》，久未拍攝電影的嘉穎在戲中飾演澳門司警，他透露無需要打，而他與心悠的感情線也只是隱晦交代。對於女友陳凱琳（Grace） 在無綫台慶用錯四字詞語，嘉穎竟大爆都唔係第一次。
嘉穎的女友陳凱琳前晚在無綫台慶失言，把「奮不顧身」誤說成「粉身碎骨」，問到他有否睇台慶？嘉穎表示剛由北京返港，沒睇到台慶，但有睇到新聞，並維護女友說：「佢都無讀過中文，四字詞語係亂用，(教女友四字詞語？ ) 沒有，我們平時傾偈一時中文、一時英文同普通話，其實佢拍劇四字詞語亂用都唔係第一次，佢好得意的。同我的朋友黃智賢拍劇，佢講得好順，但四字詞語就用錯了，但佢自己唔知用錯繼續講。（會否叫朋友睇住她？）唔使我叫，個個都會睇住，中文係拍多點就好。」
對於Grace似不明白「粉身碎骨」的意思？嘉穎說：「前晚冇見到佢，佢又冇問我，好多時有好多四字詞語，當然冇粗口在內，我返去同佢講啦。佢係想講『奮不顧身』，(咁都make sense？)接近啦，有個『粉』字。」Grace指TVB每位藝人都粉身碎骨為觀眾，嘉穎就笑說：「我咪粉身碎骨緊令大家開心緊囉，奮不顧身與粉身碎骨，意思都係盡力而為令大家有豐富娛樂性。」問到全晚個騷最好睇是Grace講錯說話？他說：「唔係呀，睇片段全個騷都幾好睇，希望出年唔係佢啦。」
心悠扮病人睇中醫
劉心悠在片中飾演一名新派中醫師，為揣摩角色，開拍前她特別跟隨朋友扮病人到中醫診所求診，學習問診過程及把脈。明年將為無綫拍劇的心悠，對於陳凱琳於台慶失言，廣東話唔流利的她笑說：「係人都會講錯嘢，咁我都有可能會咁，試過以前拍內地古裝劇，要講四句四字詞語，因為我記唔到，最後導演要我講1234、2233，之後再用配音。」
張晉跟女兒學英文
張晉透露片中與巴西裔美籍拳王不乏對打戲，日前已率先拍攝了一場，他指對方打開MMA，但拍戲經驗少，初時都擔心會傷到人。不過他大讚對方是個好有力量的摩打，他都有指導對方在安全情況下去盡一些。問到可有受傷？ 他說： 「少少擦傷一定有，雖然周身痛，但打得好開心。」年底張晉將會拍攝首部荷里活電影《悍戰太平洋2 》，屆時更會到澳洲開工，他表示為了應付英語對白，現在要女兒教他說英文。對於有指其太太蔡少芬投資有道是圈中富婆，張晉笑說：「咁咪好囉，我搵到個富婆，其實我們生活方式冇變，只係多了兩個女，(問太太拿多點家用？ ) 家用我從來唔缺，銀包成日多了錢，可能是太太塞錢入我銀包。」