反對派一直好玩「二元對立」論，唔係自己友就係敵人，撕裂社會，終於自己受返，「養出」激進「本土派」來「咬自己籮柚」。民主黨區議員、「民陣」召集人區諾軒，最近被人翻舊賬，稱他與曾經攻擊民主黨的激進「本土派」梁金成等人食飯，被人利用醜化「民陣」及民主黨，是政治低能、無知無能。工黨成員郭紹傑也加把嘴插埋一份。區諾軒則稱與不同政見者交流很正常，結果引發網絡罵戰，花生期貨指數急速上升。■記者 羅旦
份屬激進「本土派」的「香港本土力量」何志光，因在立法會選舉中狙擊「熱普城」「教主」黃毓民，同社民連等所謂「左膠」走埋一齊。選舉結束，「教主」落馬，何志光就另覓敵人。
激進飯友屢搞白鴿「民陣」
近日，他在網上電台開咪時，就狂轟區諾軒曾與梁金成、「城邦派國師」傻根（陳云根）愛徒「中出羊子」，及被逐出「城邦派」的「天河明人」等人食飯，是「不識自愛，結交人渣」，被人擺上枱，醜化了他所屬的「民陣」和民主黨，而其網台拍檔郭紹傑也插埋一份。
區諾軒其後在網上撰長文回應稱，「餐飯係我約，係都係我擺自己上檯（枱），而我認識佢地（哋），亦唔係第一日的事，佢地（哋）有好多做事手法，立場，我唔認同，不過我覺得，即使對方係點樣既（嘅）人，我至少算唔上同對方有過節，既然可以出黎（嚟）交流想法，我認為並非不當的行為。......如果同唔同政治信念的人聚會，就可以扯去比（俾）人利用，比（俾）人醜化的話，未免太陰謀論。」
區反批拍檔做文章未求證
他續稱，何志光指控「熱狗」之一的「白影」，有份出席是次飯局，「根本完全係捏造」，又對郭紹傑這名「戰友」加把口批評自己表示不滿，「點解可以唔求證，連問都唔使問就係（喺）節目度撻伐我。講到底係信任問題，如果食餐飯，可以令到大家咁有意見，去到要直接開節目嘈，我真係覺得個信任點好低。......大家係相識，算得上係自己友，少（小）少（小）事就拎出嚟做文章，我係咪咁唔可信呀。」
何志光嘲政治低能陀衰家
何志光其後在facebook連環發帖，狠批區諾軒，「係（喺）『本民前』『青政』與『熱普城』未分裂之前，係一齊攻打民主黨，『金金』（梁金成），『天河明人』及『中出羊子』，全部有份搞民主黨。『金金』每年都舉『港獨』旗係（喺）龍頭騎劫『七一』遊行係（喺）『民陣』主場搞事。......區諾軒，你的政治理解能力之低係出乎我意料之外。坦白（講），你作為民主黨員及『民陣』召集人，係兩個組織的恥辱與缺口。......區以丟人現眼及無知膚淺的說詞回應我，我只能為『民陣』得此無知無能的領袖而扼腕嘆息！......作為民主黨員，是否不用理會敵人以往多次攻擊民主黨？」
郭紹傑也在其fb發地球post，不點名揶揄區諾軒，「見到一啲同路人，畀（俾）人擺上枱。當一個人完全不揀擇地想個個都係朋友，最終就會搞到冇曬（晒）朋友。」
兩派粉絲罵戰 區求饒圖息事
雙方的支持者在網上留言互插，爆發「內戰」。有人稱與不同政見者交流並無不妥，有人則反駁區諾軒既任「民陣」召集人，就有必要「帶眼識人」；加上他是民主黨黨員，就不應該向明顯「搞」民主黨的人示好。
又有人揶揄當年傳統反對派撐「青症雙邪」游蕙禎及梁頌恆，結果搞出大頭佛。眼見網上吵成一片，區諾軒不得不「求饒」道，「將最唔應該煩惱的事，係都要逼到我成為煩惱的一部分，才是最令朋友困惑的事吧。放過我啦，信義仁德，我自問無背棄過任何一樣。」