■香香表示同老公強強都有共識，就係先努力事業，再諗生BB。香港文匯報訊 「宅男女神」岑麗香（香香）同Joshua（強強）昨日在溫哥華行禮後，正式成為「強嫂」。香香表示同老公強強都有共識，就係先努力事業，再諗生BB。問到俾老公幾多分，香香就話：「梗係100分！」至於「處女黨」成員好姊妹除了王君馨要出席昨晚的無綫萬千星輝頒獎典禮外，其餘姊妹李亞男、苟芸慧及鍾嘉欣也有現身，三人更於婚宴前接受訪問，亞男衝口而出祝香香三年抱三，眾人嘩然！
32歲的岑麗香和老公Joshua拍拖年半，昨日於溫哥華完婚，適逢北美洲遇上寒流來襲，氣溫跌至零下1度及下雪。早上一對新人，着住中式裙褂禮服，向雙方父母斟完茶。之後就換番西式禮服同婚紗，挽手步入EBENEZER BAPTIST CHURCH行禮，在神的見證及約二百位賓客祝福下，正式成為夫妻，感性的香香更忍不住流淚。
香香揀了低胸刺繡薄紗婚紗行禮，胸前十分性感，其低胸設計還讓香香谷出三吋事業線，性感非常。之後於晚宴上，香香換上約五萬元的Jenny Packham最新的SS17婚紗，整條裙繡上銀色葉子圖案，飾小斗篷形薄紗，正面看儼如短袖。
晚宴會場，以手拖手的熊仔糖為主題，加上一對笑得超甜的新人，令人感覺非常甜蜜。於婚宴現場，香香同強強企在宴會廳中央，接受全場賓客嘅祝福。二人除咗向賓客祝酒，切完結婚蛋糕後，仲甜蜜互餵蛋糕，唔少現場賓客亦高舉手機，影低一對新人甜蜜一刻！
老公婚後來港生活
事後一對新人接受訪問時，異口同聲話好感動。香香話：「今朝見到苟姑娘佢哋，佢哋(姊妹)通告都密，仲要飛到過嚟。」香香透露為免婚後keep住同老公Long Distance，所以老公會來香港一齊在香港生活！強強同強嫂再興奮地一齊展示婚戒謂:「啱啱正式結咗婚lu!」咁即係叫咩太呢？有記者笑言嗌「強嫂」，香香即笑不攏嘴，之後香香補充謂：「叫香香都得!」問到婚後是否立即造人，香香表示都有共識，就係先努力事業，再諗生BB。香香話：「其實大家都想生小朋友，但應該冇咁快，長輩佢哋想多啲，我今日收到兩隻金豬，可能要生咗一個出嚟睇吓咩感覺先再決定生幾多個，哈哈！」
欣宜搶花球贏苟姑娘
身穿大Deep V裝到溫哥華出席岑麗香婚禮的鄭欣宜（Joyce）表示，她今次係特登來搶花球，仲話苟芸慧都唔係自己對手，而最後揮贏苟姑娘，搶到花球。欣宜將戰利品放上網，佢留言：「一拋即中。It was a little rigged.」
欣宜表示希望一對新人可以白頭到老，永結同心、連生貴子。Joyce自爆原來是第一次見強強：「之前我冇見過佢，咁我之前同香香拍《辣警》（《辣警霸王花》）認識，拍完冇耐佢就同我講：『我拍拖啦！』，我就問佢係邊個？send相嚟睇吓，咁係張香香攬住佢，好sweet。見佢每次提到Joshua都好開心，近排我們拍緊《老表》，就算幾辛苦每當香香收到Joshua的短訊，都會笑得好開心。」
問到Joyce有否睇中強強兄弟團，她大讚位位都十分靚仔，她笑說：「我更加沒來錯，同埋我坐嗰圍人全部都好nice。（鎖定目標？）沒有！可能好多男仔鎖定目標係我呢！祝我好運啦。（特登打扮性感？）其實我唔知件衫咁性感，我有少少後悔，因為好凍，黐咗兩個暖包！」