■梁逸朗大鬧劉小麗在直播中拍攝街友樣貌。 視頻截圖一事無成，唯有呃Like。立法會九龍西議員劉小麗，𤓓完一鑊又一鑊，近排面對DQ官司危危乎，梗係要做吓騷來凝聚支持者啦。前晚通州街天橋底發生大火，多名露宿者失去家當。劉小麗當時就到現場「視察」，更做facebook live，又「訪問」了兩名受影響的露宿者。網民狠批劉小麗抽水，「唔知佢係無知，定係無恥！」
劉小麗前晚做facebook live時，當然唔會唔記得影吓自己個大頭，而最令人反感的是，多名露宿者的相貌無端端在鏡頭前曝光，包括部分熟睡中的露宿者。來自不同派別人士狠批她無常識。
避上鏡是常識 無知定無恥
「熱狗」梁逸朗在fb發帖批評，「小麗老母走埋去影災民個樣做乜×？」「熱狗」前頭目之妻陳秀慧轉發了該帖，稱「小麗老母係（喺）火災後落現場走去出live拍無家者個樣，然後就有人話小麗老師你真係有愛心喇。你地（哋）唔好咁低能啦好冇？傳媒拍你都×啦老實......」
大批網民留言鬧爆劉小麗。自由黨深水埗區議員李梓敬也抵唔住頸，轉發了梁逸朗的帖子，更貼文道：「好少share（分享）『熱狗』啲嘢，但係小麗老千實在太無知，一定要廣傳！露宿者呢啲議題唔係比（畀）你用嚟抽水架（㗎）！」
他指出，事發當晚得知事件後，深水埗區議會副主席、民建聯區議員陳偉明，和勞聯區議員李詠民，工聯會的陳穎欣和他已到現場了解，為露宿者提供協助，「我哋明白處理露宿者問題，係好敏感嘅，唔影佢哋相係常識吧！估唔到小麗老千為咗呃like，竟然不斷影住佢哋擺上網，唔知佢係無知，定係無恥！」
李梓敬還上載了一張眾區議員到火場了解情況的照片。照片雖然鬆郁矇，且眾區議員中無人正面入鏡「打卡」，但這就更證明他們到場不是像劉小麗般為了「打卡」。
片中人已睡 竟稱問准畀影
備受批評，劉小麗其後在fb解畫稱：「小麗已問準（准）了受影響街友接受訪問。」梁逸朗隨即再留言踢爆：「你哋睇下（吓）段live，劉小麗擺明講大話啦，佢其中一個『訪問』嘅無家者係瞓咗覺架（㗎）囉，佢仲要隊部cam埋去影佢正面，何來『問准街友接受訪問』呀？」網民「Kinyeung Poon」也揶揄道：「報夢俾（畀）佢知！」
疑為小麗支持者的「Wai Cheung Pun」就涼薄地為小麗護駕，「講真，佢哋係no body（小人物），邊個會留意佢哋尊容啊！」「See See Ng」即批評，「請你說話帶點尊重，露宿者不是人嗎？」
「Fui Hung Shek」就嘆道：「可唔可以做啲實事? 佢做左（咗）議員咁耐有咩立法層面既（嘅）政績？」 ■記者 羅旦