香港人其實真係幾善忘，好似人稱「小麗老千」的「自決派」立法會議員劉小麗，在立法會選舉期間猛話自己當選後定會捐一半議員人工，並在其選區九龍西設立「家務義工隊」幫助老人家，仲話會公佈賬目。不過，小麗老千在被網民追數兩個月後始捐出去年10月人工的一半，到現在都再無聲氣。「無敵神駒」仇思達近日再發帖追數。有網民揶揄，「政棍講嘢你都信，認真你就輸了。」 ■記者 羅旦
小麗老千在去年立法會選舉期間大開「支票」，包括當選後會捐出一半議員人工成立所謂「義工隊」，更提出所謂「免供款退保」，惟當選後隨即走數，她在去年11月領取了10月的薪酬後，所謂「捐一半人工」一直無聲無息，直至仇思達發動網民追數，她拖延到11月下旬才不得不「找半數」──分別將一半人工捐給「社區發展陣線」、「香港婦女勞工協會」及「區區有飯開」，所謂「義工隊」仍然唔見影。
去年12月至今 小麗「承諾」冇影
不過，由去年12月到今個月，小麗老千似乎都無再捐過人工，佢11月講話計劃半年內成立「義工隊」，現在都過咗近半年仍然影都冇，所謂「免供退保」自然更加冇咗影啦。喂，阿姐，妳身為立法會議員都要交代吓係嘛！雖然面對DQ官司，但妳訟訴費用靠「眾籌」，仲有議員、理工大學香港專上學院人文、設計及社會科學學部講師嘅人工同兩層樓揸手，唔係咁都要走數吓哇！
仇思達近日就出post追數：「自從劉小麗議員於去年11月捐過一次半個月人工之後，就已經無晒下文。請問劉小麗議員會否兌現競選承諾，在餘下任期繼續捐出一半人工？ Lau Siu Lai（劉小麗）請回話。」不少網民大鬧小麗老千又走數，也有看透世事的網民坦言面對政棍，「認真你就輸了！」有人則大玩有聲post，為Beyond《灰色軌跡》填新詞，一人一句下寫成︰「捐一半人工，何時麻醉我抑鬱？過去了的一切計利息。找不了利息，DQ沒法看得清，再屈神驅（駒）追數叫被迫。」
麗粉「護花」：前世有仇
一名疑似小麗老千粉絲「Roland Chi Wing Chan」則「護花」留言道︰「仇先生，真係唔係好明，小麗老師只係小女人一名，點解好似咁大仇恨，經常玩針對？老實說，其他議員走數，比比皆是，而且佢單官司亦未完。我亦知道佢忙碌得很，莫非你大哥姓如其人，前世同佢有仇？」
可惜仇思達就真係冇咁嘅「護花」心情，反問到︰「陳先生，真係唔係好明，小弟只係小市民一名，點解劉小麗好似咁大仇恨，經常玩針對？老實說，其他議員被監察，比比皆是，莫非你劉小麗姓如其人，成世×流流？」「Chan Kanam」更抵死說到︰「稱呼主張女性平權、教gender（性別議題）嘅小麗老師做『小女人』？問過佢同意未？」
講咗咁耐，小麗老千點回應呢？雖然仇思達已經tag（標籤）咗小麗老千嘅個人facebook，亦有人tag埋佢個fb專頁「小麗民主教室」，但到截稿都唔見佢有回應，只係出咗post講自己嘅墟市活動，實行當睇唔到人哋追佢數囉。
網民寸爆老千
Yanster Leung：佢一陣話，我有捐架（㗎）（但我無話捐幾多次）。
Adam Leung：捐一半月薪啫，冇話個個月捐喎！
黃宇翰：議員講嘢唔算數有乜咁出奇？哈哈哈哈哈！
Peter Lo：政棍承諾，認真你就輸啦！
Ted Fong：話明老千，你信就係白痴。
LiJohnny：算把（罷）啦！叫佢捐$（錢），佢話、攞奀攭R好過......
Treewind Wong：一陣又話你迫害佢（小麗老千）。
Ken Chung：找不了利息，DQ沒法看得清，再屈神驅（駒）追數叫被迫......
Ada San-gu：捐一半人工，何時麻醉我抑鬱？
Joey Yam：佢入左（咗）立法會大半年除左（咗）識擺烏龍，佢仲有乜野（嘢）貢獻？
資料來源：仇思達fb留言
整理：羅旦