■陳秀慧得閒到可以即刻（紅圈）睇到邵家臻個矯情post兼即刻反擊。 fb截圖矯情真係「左膠」嘅一大特質，好似社福界立法會議員邵家臻（邵膠樽），明明喺「佔領」行動期間企喺大台做咪手大大聲，俾警方落案起訴自然不過。而自詡「佔中十死士」嘅吽A喺面臨隨時被判入冊嘅呢一刻，竟然諗到個「死」字，更喺facebook將自己同已故美國黑人民權領袖馬丁路德金被刺殺相提並論，睇到一直唔妥「左膠」搶光環嘅「熱狗」牙癢癢。
驚要入冊驚到「被刺殺」
「熱血公民」過氣頭目黃洋達個老婆陳秀慧（皇后），就寸邵膠樽算老幾，「邊有人話要刺殺你」，叫佢嗌返兩句「無畏無懼」就算數。而「城邦派國師」陳云根（傻根）都出嚟抽水，話自從「熱普城」潛水之後，反對派就嚇到??家咁樣！
雖然前日係清明節啫，都唔使吓吓諗到要陪先人啩？不過邵膠樽前晚就喺facebook出post（帖文），話佢哋9個因「佔領」而被正式起訴嘅人坐埋一齊商量前路，自己一路傾就一路諗起49年前嘅前日（1968年4月4日），即係馬丁路德金喺演講現場被刺殺身亡嘅一日，仲引用咗馬丁路德金其一段留畀後人「前仆後繼」嘅信念，最後更加用上氣勢磅礴、給予逗號嶄新意義嘅「鄺體」：「我，受教。」
皇后傻根見矯情文火滾
自從轉玩深潛之後，「熱狗」非常之多時間做鍵盤戰士，皇后前晚仲得閒到可以即刻睇到邵膠樽個post兼即刻回應：「抗爭，就是為了讓你們有機會寫這種矯情文......明明你哋都自首咗啦，出嚟咪嗌幾句無畏無懼咪算囉......邊有人話要刺殺你，放心啦，你唔係馬丁路德金呀。」
傻根亦抽埋一份，仲自詡「社運宗師」：「我們退下社運之後，『泛民』嚇到咁樣......」
「熱狗」一直對「左膠」恨之入骨，其中一個原因係佢哋覺得有咁多自己友喺多場「抗爭」中被判入冊，但班「左膠」似乎仲係完好無缺，如今邵膠樽瀕臨入冊但喺度又呢又路，自然一把火。「Trixia Pat」話：「呢條×樣拎馬丁路德金貼自己金？馬丁路德金有冇出賣Malcolm X（抗爭路線與馬丁路德金不同的回教教士）先？」「Steven Lee」就叫邵膠樽洗定八月十五：「搶人光環，??家咪求仁得仁囉。坐過監個光環仲光，益咗�哋啦。」 ■記者 陳庭佳