■高慧然轉發「內容農場」的假新聞。 fb截圖放流料係專欄作家高慧然嘅強項？繼早前喺特首選舉期間，將惡搞林鄭月娥嘅facebook專頁當係林鄭競選專頁之後，高慧然前日又喺自己fb轉載稍有常識都知係假嘢嘅「內容農場」（content farm）文章，內容聲稱紅十字會血庫啲血「捐曬（晒）比（畀）班大陸人」，又稱內地人在港進行手術接受輸血，等同將血液「偷運出境」云云。唔少人對於高慧然幫手流傳「內容農場」啲假嘢十分不滿，批評呢種反捐血嘅講法只會害死人，直斥︰「這消息是假的，去年都傳過。不要信。請用腦想吓。」
亂信「內容農場」 分享教壞人
令人唔知好嬲定好笑嘅係，上述篇文嘅作者名叫做「你ON9所以我ON9」，即使已經明話你戇居，高慧然前日依然喺fb轉載篇文。內容話紅十字會血庫近年經常告急，就係因為啲血「捐曬（晒）比（畀）班大陸人」，仲將內地人在港接受輸血等同將血液「偷運出境」，話同體內藏毒偷運出境冇分別喎。
咁樣嘅內容，高慧然照樣share，仲揶揄話︰「捐血救人，捐器官救人，大愛喇喂！」最終引來大批網民留言批評，先加返句「是非對錯自行分析」當無事，但就被「Radar Hei」打臉謂︰「是非對錯自行分析咪就係錯囉呢單假舊聞！」
俾人踢爆 厚面皮拒認錯
唔少網民都鬧佢「農場文章都信，仲要不斷轉載」，自稱「反中」嘅「Patrick Lee」都話睇唔過眼，留言指出「內容農場」成日老作，「的確紅十字會血庫呢幾年成日告急，但從來無機構或傳媒證實中國（內地）病人影響血庫講法喎。」高慧然依然賴係私院收多咗「中國（內地）病人」，所以用多咗血。「Patrick Lee」續指出︰「人口老化呢多咗人做手術，唔通唔理呀？......根本紅十字會早已經講咗係捐血需求追唔上醫療服務增長，講真嗰句作為公眾人物，係咪搞清楚share，而唔係share內容老作嘅『內容農場』文呢又？」
不過，高慧然繼續死撐，仲話香港人嘅血絕對唔可以用喺內地人身上，「如果諗到D（啲）血流在某D（啲）畜的血管中，我會想撞牆。」「Yen Mitsui」就反駁︰「那觀念是錯的。坦白講，生命是平等的。有錢去外國醫病既（嘅）香港人或者移民在外地既（嘅）華人，都係用當地（捐血者）既（嘅）血，情況是一樣的。」「Jason Cheung」更話，假如擔心啲血俾內地人用咗就叫人唔好捐血，「咁不如醫院學校都唔好起喇，一樣有『新移民』用㗎......呢啲理論同單假嘅舊聞，估唔到又有人再嚟吹......」
事實上，紅十字會過往都發過聲明澄清，強調收集返嚟嘅血液只供香港醫院病人臨床輸血治療使用，叫市民千祈唔好誤信謠言。紅十字會亦解釋，近年血庫告急主要原因係香港人口老化，需輸血的長者數目急增。到底唔捐血會害死邊個呢？真係「是非對錯自行分析」啦。 ■記者 甘瑜