公民黨黨魁楊岳橋（戇橋）去年2月參與新界東補選入立法會時，信誓旦旦話要守住「關鍵一席」，真係言猶在耳，但近日喺立法會嘅投票就連番缺席。繼上次用特權法查選舉事務處電腦失竊，戇橋等人冇出席投票，令贊成同反對票打和，議案無法通過之後，前日財務委員會注資迪士尼議案投票時，戇橋再一次「關鍵地無影」，唔少網民當晚就喺facebook出post追數，問「關鍵楊岳橋呢喂？！」不過，戇橋並不孤獨，公平啲講，當日缺席嘅仲有「專業議政」梁繼昌、葉建源同李國麟，有網民就怒斥︰「所謂『泛民』去左（咗）邊......投佢地（哋）入去......點知影都無埋。」
反對派喺立法會人數少過建制派係人都知，理論上應該更積極參與會議投票去盡力表達意見，但每次關鍵時刻都總有幾個反對派議員係唔會出席投票㗎。例如上星期五內務委員會就特權法查選舉事務處電腦失竊案投票，結果竟然係25票贊成、25票反對，爭一票就可以改變局面，唔少人追數係邊個「關鍵一席」冇出席投票，原來就係戇橋、民主黨嘅畟唹茼P許智峯，令唔少傳統反對派支持者嬲爆，激進「本土派」同「獨派」梗係乘勢追擊。
陣前逃亡 被恥笑「掛住拍AY」
話口未完，前日迪士尼撥款，又有幾個傳統反對派失蹤。「關鍵一席」嘅戇橋再一次榜上有名，另外仲有梁繼昌、葉建源同李國麟陪佢。「獨派」fb專頁「香港民族陣綫」隨即出post話︰「【關鍵一席繼續關鍵地無影】邊忽關鍵呀？睇過？睇過？」並加上「大局既（嘅）野（嘢）」、「關鍵一席」、「陣前逃亡」等hashtag（標籤）。「啤梨晚報」都出post點名︰「楊岳橋又缺席投票。」fb專頁「廢青事務委員會」直情tag埋戇橋話︰「公民黨 Civic Party Alvin Yeung 楊岳橋 ，請問你呢位 #關鍵一席 又又又去咗邊？」
唔少人都笑戇橋可能掛住拍佢嘅「ThisAY」短片。「Kwan Wing Yip」就話︰「人家可能去拍段搞笑片擺上FACEBOOK。」「Cardio Tze」揶揄︰「唔洗（使）做ThisAY咩哥？」「Leo Wong」亦問︰「楊生，又係你呀！近期拍Facebook很忙嗎？」
「投你哋入去 點知影都冇」
已經退出公民黨保平安嘅立法會議員毛孟靜就出post話︰「對不起我們盡做。仍然輸。我們不夠人。」中大學生會代表會主席潘智鍵就cap圖出post，數埋上次迪士尼議案中止待續條數話︰「上次過中止待續25:27，有四個反對派唔見左（咗）人，咁叫盡做？之後又繼續叫人顧全大局，要保住關鍵一席去投票，仲要繼續俾（畀）你地（哋）×落去？」並加上「做少數派唔寸票必爭」、「反對左（咗）當做左（咗）」、「唔見左（咗）人個（嗰）幾個尊貴嘅議員諗住點問責」等hashtag。嗰次中止待續缺席嘅議員，仲有梁繼昌、李國麟，同埋「接住力」缺席嘅公民黨郭家麒同陳淑莊。
「Chow Kent」都忿忿不平話︰「之前中止待續，你『泛民』有4名議員沒有投票 ，如何解釋？ ......正式投票點人頭 。你一定輸畀保皇黨，冇得講...... 中止待續唯一的機會，『泛民』有4人沒有投票 ，註（注）定敗局......」「Ken Chan」就無奈表示︰「建制投贊成就預左（咗）架（㗎）啦，但比較想知其他所謂『泛民』去左（咗）邊......投佢地（哋）入去......點知影都無埋。」 ■記者 甘瑜