■黃于喬經常在facebook和Instagram貼性感相。 IG截圖一時衝動加入「港獨派」，真係後患無窮，「不可一，不可再」。近日，與「熱城」有仇的「青症」及「港大獨幫」支持者、中文大學前學生會幹事會常務幹事黃于喬，在fb呻被麻甩佬騷擾，「熱城」支持者即時打蛇隨棍上，指她被人撩係因為「經常」喺IG貼性感相，輕佻不莊重咁話，有人更稱她似性工作者才會被人「問價」。黃于喬反擊稱此舉是「blame the victim（怪責受害者）」。黃的支持者更揶揄對方是因為冇人撩而唔抵得。
「熱普城」中人自立法會選舉失敗後四處樹敵，特別是有兩人當選的「青年新政」及其支持者，大搞所謂「清算」，就連「普羅政治學苑」話事人黃毓民也被指為「狗主」，更何況其他「青症」、「港大幫」的支持者？
聲稱被麻甩佬跟蹤搭訕
一直「反父權」兼主張「身體自由」、網名「圓咕碌」的黃于喬，近日發帖稱自己「喺條街光天化日之下，俾麻甩佬係咁跟住」兼搭訕。她借題發揮稱「某d（啲）（自以為係）父權人士會話：『你咁早（？）出街預左（咗）啦！你著（着）件露肩衫，無好好保護自己，唔怪得人。』」她續指，其後「有個啊（阿）叔走出黎（嚟），好快咁幫我開門，叫我快d（啲）入個商場，然後喝住個麻甩佬：『喂！咪搞人啦。』」，話呢啲先叫「真父權」喎。
被批氣質不莊重衰輕佻
此帖一出，「熱城」中人個個好似冇咩重要得過呢件事咁瘋狂發帖、留言。其中「Crystal Li Yuen Man」上載了黃于喬的帖子截圖，稱自己要以為人母的身份說：「好多女人會因為有人當街撩佢而自豪。其實真相是，你氣質不莊重，給人輕挑（佻）、容易到手的感覺。」
黃于喬在自己的fb「截圖再截圖」，反擊道：「blame the victim最佳示範。我比（俾）人跟係我氣質唔莊重、輕佻、容易到手。......我講出黎（嚟），就係自豪，就係蕩婦。......比（俾）人跟係受害人嘅錯，講出黎（嚟）哪怕只係抒發下（吓）感受就係自豪、『雞格』、蕩婦。咁有咩事唔敢出聲啦係咪？」
「港大幫」粗口教師還擊
「熱城」口中的「港大幫」之一、港大學生會刊物《學苑》前副總編輯王俊杰留言力撐：「有個咁嘅老母真係三生修到。」「粗口教師」林慧思也做炸兩稱，「自從佢（『Crystal Li Yuen Man』）信咗（『城邦派國師』）陳雲之後，個人慢慢變咗，我唔明陳雲點解可以影響一個人，可以影響得咁犀利！......『熱狗』有名你叫架（㗎）啦！當然會亂咬人。只要得罪過佢地（哋）其中一個人一次，就會成群出晒嚟咬人。我好記得（『熱血公民』前頭目）黃洋達講過既（嘅）疆（殭）屍論，而（??）家佢地（哋）變晒疆（殭）屍。」
上載黃裸胸照指自己攞嚟
「Crystal Li Yuen Man」其後「反擊再反擊」，包括貼出黃于喬及其友人的疑似裸胸照，「今天撩佢的男人，可能50%係佢follower（除非唔係）。如果佢係我個女，我真係會教『必自侮而後人侮之』。......你放J圖（性感照），人地（哋）會對著（着）你的照片手淫（我故意不說J，我要說手淫），大膽啲的，甚至會跟縱（蹤）你。你反而冇防避之心。」
親「熱狗」的「手作達人」吳斯翹（Billie Ng）留言稱：「冇睇亦舒大的女生是不會明白矜貴是什麼，好彩我個係仔。女仔唔矜貴其實得益的不是女仔自己。」「Crystal Li Yuen Man」回應道：「西門慶看中潘金蓮，是因為smell（聞）到大家是同類。」吳斯翹則稱：「也不一定，男人撩你是一件事，你自己經常掛在口邊是另一回事。」
睇完雙方同支持者嘅留言，老實講既侮辱女性又充滿仇恨，真係雙方都幫唔落。作為普通人真係識條鐵，大家都係食吓花生算啦。 ■香港文匯報記者 羅旦