「狗主」黃毓民同佢徒弟黃洋達（狗達），仲有「城邦派國師」傻根（陳云根）全面決裂，兩邊互相數臭對方就好似連續劇咁上映，而最新一集繼續力數狗達如何忘恩負義。有狗主支持者前日喺facebook寫公開信畀「熱血公民」嘅鄭松泰同鄭錦滿，以拉一派打一派方式，力陳狗主對狗達多年嚟嘅「養育之恩」，話狗主喺選舉時為狗達同傻根幾乎揹起晒所有經費開支，但今日一停狗達每月3萬蚊嘅資助，對方即刻反面，仲請埋被掃地出門嘅傻根去自己個台開咪。不過狗主旗下嘅MyRadio噚晚就公佈，鄭錦滿已退出，其節目已經結束，睇嚟同佢哋訴苦都係得啖笑。
狗主多年「恩情」逐件數
力撐狗主被辜負嘅「黃志光」，前日喺fb寫咗篇3,000幾字嘅公開信，希望鄭松泰同鄭錦滿可以還狗主一個公道。佢首先用好大篇幅講狗主對狗達嘅養育之恩，包括︰2012年狗達想選立法會，狗主力撐兼包選舉經費，仲因此同「人力」結怨；到狗達要搞《熱血時報》、「熱血公民」，狗主就不斷寫專欄、寫書、拍片、開騷賺外快去幫補狗達；舊年9月立法會選舉，狗主又為狗達同傻根揹晒「熱普城」5區選舉經費咁濟。
不過，當「清算派」葉政淳等人喺敗選後清算埋MyRadio班員工，狗主希望狗達出嚟講兩句時，狗達唔單止冇出聲，仲請葉政淳打邊爐。「黃志光」仲話，狗主輸咗選舉，每個月少咗10幾萬蚊收入，但照出糧畀之前嘅議員助理，最後只好暫停每個月3萬蚊對狗達嘅支持，結果狗達兩公婆就公開同狗主班助理反面。
見到狗達最近宣稱兩個鐘頭之內籌到10幾萬蚊、傻根一開節目又話科到9萬蚊，「黃志光」反問︰「係咪因為自己有籌錢能力啦，就可以唔理以前嘅『金主』同『恩公』？咁有錢，點解又唔將立法會選票每張14蚊嘅錢還返俾（畀）幫佢哋出選舉經費嘅教主呢？」
舊友乘機批狗達用完即棄
另外，前「熱狗」李政熙前晚亦出帖，直言「道義呢啲嘢因人而異啦」，又乘機訴苦，話自己之前跟狗達拉隊去救狗主，但之後出咗事，至今都仲要去警署報到，但《熱血時報》就不聞不問，「係呀我×緊自稱『最×講道義嘅熱血時報』啊×你老母！仲話會企係（喺）抗爭者一邊喎！」
雖然網上留言撐狗主嘅人唔多，但好多人都話對狗達嘅批評幾中肯，所以，可以肯定嘅係，狗主真係養狗咬蘿柚囉。 ■香港文匯報記者 甘瑜