■蘇錦樑與得獎者合照。民建聯供圖民建聯早前搞咗個「回歸正能量 銀禧創新天」微電影創作比賽，顧名思義就係慶祝香港回歸祖國20周年同埋民建聯成立25周年，最後有20隊報名參加。
頒獎禮前日喺民建聯總部舉行，邀請到商務及經濟發展局局長蘇錦樑、民建聯25周年大型活動工作小組主席彭長緯、立法會議員柯創盛、青年民建聯主席顏汶羽，三個專業評審包括作曲家鄭汝森、導演呂冠南同監製黃永峰、比賽召集人胡綽謙同香港多媒體設計協會主席楊景欣擔任主禮嘉賓。
蘇錦樑致辭時話，人生就係舞台，每個人都好似演員咁演好自己嘅人生，又以今次微電影比賽做比喻，勉勵港人如果將生活點綴一下，就可以成為一部電影，再伸延一下仲會成為一套電視劇。彭長緯就希望，青年可以透過微電影比賽回顧香港回歸20年嚟嘅變化，又大讚作品各有特色，顯示出香港嘅多元文化。
比賽分為兩個組別，分別係「愛國愛家、關愛共融」同「香港展活力、回歸同樂20年」，前者由《香港人 我們的核心價值》奪得冠軍，內容講到有人覺得自由、法治、人權等核心價值受損而想移民，但其實香港核心價值仲包括身份認同、多元共融、關愛互助等，唔應該放棄；後者就由《慢活》奪得冠軍，片中主角係「電車男」，鍾意喺慢慢行嘅電車上面睇香港不同地方充滿活力嘅一面。每套作品都可以喺青年民建聯facebook專頁欣賞。 ■香港文匯報記者 陳庭佳