■莫乃光在facebook貼文，為遲到道歉，被網民狠批。 fb圖片人類總要犯相同的錯誤？現時不少市民已是精明監督者，邊個議員有無投票都一清二楚。繼早前「關鍵一席」公民黨黨魁楊岳橋等人冇投票俾網民鬧爆，噚日立法會工務小組委員會討論啟德體育園撥款，最終以18票贊成、17票反對通過，冇去投票嘅資訊科技界議員莫乃光就率先自行引爆，喺facebook貼文︰「今早於立法會工務小組會議遲到，錯過表決反對啟德體育園撥款，我萬分抱歉，日後不會再犯同樣錯誤。」不過，自從投咗票畀反對派、就俾人多次賣豬仔嘅網民當然唔收貨，留言話︰「上年投你一票，我萬分抱歉，日後不會再犯同樣錯誤。」
網民：「十幾萬人工仲學人遲到？」
莫乃光個post底下仲有好多人留言表達不滿。「Fung Kwan Yin」就反問︰「十幾萬人工仲學人遲到？」「Patrick Yu」亦問︰「投左（咗）票比（畀）你地（哋）所謂『泛民主派人士』有乜用？」
「Tomy Ho」就話︰「次次都係你地（哋）黨（『專業議政』），想點×樣啊？」
「Uri Leung」開火謂︰「 一句抱歉其實有乜用？反而想知之後再犯係咪辭職？不過都唔緊要啦香港人都繼續信你地（哋）既（嘅）都會繼續比（畀）票你地（哋）。」
「Gary Law」就話︰「不要分那麼細，反正投票時就關鍵一票，但立法會投票就永遠都爭你哋所謂嘅關鍵一票，年復年......永遠旨意『飯（泛）民』就死硬加屍骨無存。」
有網民留言叫佢辭職，「Edmond Chui」就冷靜表示︰「無嘢既（嘅），還返300幾億俾（畀）香港人咪無數囉。」
黃碧雲尹兆堅亦缺席
不過，莫乃光並不孤獨，陪佢缺席嘅仲有民主黨黃碧雲同尹兆堅，雖然佢哋冇自我引爆，但網民都記得佢哋。「Edward Kong」一視同仁批評︰「點可能喺咁重要時刻會犯呢D（啲）低級錯誤？三個民主派議員都要負責。」「Kelvin Chan」就質問︰「黃碧雲......你除左（咗）最叻驗水之外有乜用？啟德係你既（嘅）選區，連跟你選區有關既（嘅）會都唔去開，咁選你做乜？當打牌戥腳呀？」「Tim Tong」就揶揄民主黨謂︰「建制b隊做實事。」 ■香港文匯報記者 甘瑜