「熱城」搞清算似乎已經搞到精神錯亂，有人打噴嚏就以為對方有咩陰謀，好彩結果都係狗咬狗，冇傷及無辜，大家食花生就更食得津津有味。「城邦派國師」傻根（陳云根），及其傍友、自稱「作家」的莊元生，被「狗主」黃毓民逐離其網台後，即時去到狗達（黃洋達）的網台搵食，一班當傻根係神嘅云粉當然捧場。在節目播出後，有人質疑莊元生準備不足，甚至「讀錯字」，丟傻根架喎。莊元生就反擊話所謂準備不足「絕對不是事實」，其粉絲則指責有云粉搞分化，結果又爆發「網絡上的世界大戰」。■香港文匯報記者 羅旦
傻根和莊元生在「熱狗」網媒開設所謂「建國神話」節目。「熱城」支持者、「無名無姓」的「Fat Jing（法正）」在節目開播後發帖，大讚「陳雲老師博學廣見唔使講」，「但莊元生整體事先準備似有不足！」
「熱城」譏唔識讀唔預先查
「法正」指稱，「1.做直播，引經據典，但現場直播大部分人根本睇唔到你（莊元生）嗰啲字同內容係乜！......2.作為主持， 既然引用經典，讀經典內文時，莊元生竟然話有一個字唔識讀，唔識唔緊要，點解唔事先查一查，準備好啲， 你都要知道你引用嘅經典講緊乜先得，唔係又畀機會敵人耻笑，又掉（丟）陳雲老師架！」
被指為專搞分化的網民「Asras Kamangir」留言，「咁公度（道）啲講，陳雲老師都唔識讀，又唔好話莊先生丟陳先生架。」「法正」即反駁道：「你米（咪）又嚮（響）度誤導問題！篇野（嘢）你（莊元生）揾，講嘅內容自己事前唔準備好清楚，明知要讀、唔識唔預先查。......唔好話莊先生丟陳先生架？甩漏令陳雲尷尬掉（丟）架，已經唔係第一次！」
莊元生其後也加入戰團：「法正指責我事前準備不足，我是絕對不能同意。《建國神話》第一集的文獻資料，我花了大量時間準備以及消化與思考，當晚十一時節目直播出街，一小時後，即有節目重溫，為免大家看重溫不便，我漏夜於凌晨將該集的文獻資料貼在《建國神話》的面書群組，翌日一早，我一連貼了多個補充的圖文資料，在這個《建國神話》面書群組上面，相信大家都看到。說我表現不好，我可以接受，說我事前準備不足，絕對不是事實。」
云粉寸爆唔準備仲左兜右兜
云粉「藍鳳凰」即留言道，「老老實實，節目『事前準備』唔單單包括一大堆文獻，係包括埋識讀，否則洗（使）乜做節目？將文獻直接post上網叫人自己睇仲省水省力。......不過冇所謂，反正啱啱開始，有則改之，無則加勉，後面越做越好就得~」
雖然寫埋「有則改之，無則加勉」來打圓場，但莊粉條氣就非常唔順。「HKk Chu」稱：「讀錯隻字叫準備不足，咁考試99分係咪又叫溫書唔夠？瑕不掩瑜，漸入佳境就好，不要太嚴苛啦。」「藍鳳凰」即時反擊：「讀錯？係唔識讀。失誤就係失誤，叫人改進就叫嚴苛，咁仲有質素提升可言？連呢啲微細嘢都要左兜右兜，點同大台鬥？返屋企訓（瞓）覺仲實際。」
莊粉反鬧云粉搞分化
莊粉就大鬧「藍鳳凰」搞分化。「Venus Sakura」稱：「網絡遊魂的事，不用在意。」「Gordon Lam」稱，「我們作為聽眾是沒有資格批評莊老師的。......即使你有付出『課金』表示支持，那也只是謝師金或稱支持金，而不是『月費』。謝師金是單向的捐助，是純粹表示支持，聽眾感到沒趣，可以離去，但不應無禮的指責或批評。」
「藍鳳凰」再反擊：「啱就啱，錯就錯，唔會因你有畀錢就由錯變啱。呢啲係常識。......不過就係『唔識讀』之嘛，咪下次讀查完返啱岒o。連咁嘅要求都要講資格，仲話人『分化』、『離間』、『資格』、『網絡遊魂』、『別有用心』，呢啲咩玩法？」
莊自我安慰：唔係「國師」嘅人
在罵戰期間，狗達突然留言刷存在感：「見咁多留言，本來想爬文睇下，但睇少少就放棄左（咗）∼∼天氣太熱。」莊元生則突然一句：「證明藍鳳凰唔係『國師（傻根）』嘅人。」「李瑞欣」就揶揄道：「無錯，大家都係獨立自主，唔似其他人覺得網民係受控制。」
睇住「熱城」不斷內鬥，識笑其實真係好好笑。