昨日沙田賽事成為雙潘天下，頭六場潘頓同潘明輝上演接力賽，一開波潘頓騎隻「旺蝦王」大勝亞軍馬五個幾身位，替蔡約翰贏得今季第90W，同告仔一季贏91W頭馬紀錄只差一場，而「旺蝦王」獨贏派彩$10.5暫時成為今季最低紀錄。到咗第二場潘頓起個孖兼替隻處女馬「友瑩采」開齋。第三場則輪到潘明輝接力贏隻「海嵐一號」。到咗第四場潘頓又替另一隻處女馬「曾幾何時」取得首Ｗ，並在第五場騎隻「友誼之星」贏埋個人第四Ｗ。到咗第六場又輪到潘明輝發威，贏師父隻「勝利仔」，至此雙潘組合直落連贏六場賽事，直到第七場先至俾田泰安贏隻「威利熱流」，打破咗雙潘呢個壟斷局面。而莫雷拉就苦戰到第八場先至憑呂健威馬房匹「真好彩」贏馬兼捧走會員盃，唔知係咪贏開條路，到咗第九場雷神贏埋沈集成馬房件「四季旺」，起個孖寶總算對擁躉有所交代。尾場就由巫顯東替「獅子驄」完成五連勝。
數最威水馬房當然非蘇保羅莫屬，全日出馬六匹取得四冠一季，成為蘇保羅從練以來首次一日四喜臨門。