馬迷都知道莫雷拉身手最好，只要佢肯騎嘅馬，點都可以秤高多少，既然一般馬迷都識得咁諗，練馬師同埋馬主又點會唔識呢個道理，不過莫雷拉得一個，大馬房請莫雷拉騎馬成數就會大啲，因為大馬房搵得雷神騎嘅馬，多數有番咁上下實力，相反，細馬房要搵莫雷拉幫手，除非隻馬真係好有實力，否則莫雷拉未必會肯騎，所以目前有個現像，下風馬房搵到莫雷拉披甲嘅馬，十居其九有料到，好似鄭俊偉咁，早前搵雷神騎隻「劍飛聲」，結果順利贏馬。
今次夜賽，又有類似「劍飛聲」例子出現，就係第二場五班一哩賽，李易達有隻「勝利威」（圖5號）列陣。呢隻馬今季由蔡約翰加盟李易達馬房，對上兩季喺蔡捶C季都有場頭馬交出，兩場都係谷草一哩，今季到目前為止，遲遲仲未贏得頭馬，前仗跑四班谷草千二米，雖然路程嫌短，但仍跑入第四名，最近呢隻馬降落五班上陣，馬房認為機會來了，決定請莫雷拉壓陣。呢隻馬今季轉入李易達馬房之後，經已跑過十場，冇一場係由莫雷拉騎，呢次可以請到莫雷拉策騎當然有計。再睇呢隻馬過往兩場頭馬，其中一場係出自莫雷拉胯下，所以呢隻馬點樣發揮佢一定清楚。上次五班賽跑谷草千二米落敗後仄原因，馬房賽後發覺呢隻馬前腳疼痛，所以呢場五班谷草千二米，成績係點樣大家唔使介懷，發現問題後，馬房同呢隻馬積極料理腳患，大家不妨同佢計吓數，由上次跑完場五班谷草千二米後，經已有兩個多月無跑，馬房用咁多時間去料理呢隻足部健康有問題嘅馬，只係想養好狀態至出賽，當然今次操好用埋莫雷拉跑，擺明車馬要搏到盡。再話一個數據俾大家知，今季雷神五次夥拍李廄馬出擊，成績係兩冠一亞，呢隻屬季內第六次合作嘅馬，大家可以放心捧場。