喺四月底五月初時，高伯新仲只係得八場頭馬，有邊個敢講佢可順利上岸，相信唔會有好多人。不過，當呢個馬房正處低谷時候，卻有一位馬主雪中送炭，呢位就係「精壯神駿」馬主袁仕傑，連同另一匹同主馬「魔幻神駿」齊齊轉入高伯新馬房，呢位練馬師喺軍心不定情況下竟獲新血加盟，相信屬馬房成績起死回生嘅最大強心針。而呢兩隻「神駿」系馬，以「精壯神駿」最有機會替高伯新省招牌。呢一隻馬以前放喺沈集成馬房，曾經贏過兩場，一仗田草千二米，另一仗谷草一哩，當中以谷草一哩演出最準，跑過八仗得一冠一亞兩季，上名率有五成。高伯新接手呢隻「精壯神駿」後，冇第一時間同隻馬跑番有根有據嘅谷草一哩，所角逐兩場賽事係谷草千八同埋一千米，由於呢兩個路程，以往都未跑過，馬匹發揮唔出水準屬正常事，呢兩仗目的顯然屬考驗馬匹加盟新倉後的狀態進展，結果呢兩仗都係跟跑而回，講睇頭冇乜，但復課期間，見隻馬神態相當生猛，最重要就係收身結實。而倉主再同呢隻馬報戰谷草千八米，顯然摸到呢隻馬個底，目前性能宜長不宜短。由於「精壯神駿」今季經已久無表現，上季可以喺三班贏馬及經常上名，如今竟然可以落到四班上陣，評分有咁大優惠，再配合季尾呢隻馬狀態開始復甦，今次高伯新真係可以話行運醫生醫病尾，加上今場遇到一群相當弱對手，呢類大好建功機會嘅場合，高伯新又點會輕易放過，值得大家捧場。