最受歡迎人馬獎終於揭盅，最受歡迎馬匹係「佳龍駒」，至於最受歡迎騎師就係莫雷拉，蔣嘉琦排第二位，但支持百分比只係有六個巴仙，同上屆相比真係差好多，支持度大跌，當然跟今季多咗負面嘢有關。而最受歡迎外地馬就由「雲絲仙子」奪得。上述三個獎，都可以話眾望所歸，「佳龍駒」馬王唔知有冇份做，但馬主起碼獲得一個安慰獎先，假如可以當選為馬王，自然仲更加安慰。
「佳龍駒」馬主洪祖杭非常肯使錢買好馬，「佳龍駒」不幸身亡，佢經已搵咗大摩幫手搵好馬，近期收到風，大摩經已幫佢搵到隻好馬，呢隻就係新鮮出爐昆士蘭打吡冠軍，據聞身價非常貴，要成千八萬港幣。無乜意外，經過獸醫檢查獲得通過嘅話，將會喺九月運港服役，希望呢隻昆士蘭打吡冠軍可以學「佳龍駒」咁創一番功績。「佳龍駒」之後都未有同主馬威過，隨着唔開心嘅嘢逐漸衝淡，亦搵到隻好馬補替「佳龍駒」，放下心情後呢個禮拜不妨吼吓洪先生名下隻「馬飛龍」。呢隻馬經已成季幾兩季未贏過，對上一次贏馬係前季由蘇偉賢訓練，於四班谷草一哩贏「紫電明珠」，上季無贏過，今季中先至轉投賀賢馬房，賀賢接手後，先後安排呢隻馬跑過五仗，除最初一仗跑谷草一哩外，近四場全部安排跑泥地，其中一場更安排跑泥地千八米，結果成績唔算差，呢場泥地千八米「馬飛龍」用放鳶戰術出擊，放到最後二百米仲未斷得晒，結果跑入一席第四名，輸俾頭馬「榮冠大道」唔夠四個身位。呢一場試準咗「馬飛龍」長力，今次決定再跑番泥地千八米，鞍上人依然係跑呢個路程放入一席第四名嘅潘明輝，最重要呢次隻馬只係負一○四磅上陣，咁輕磅位，跑到季尾再佔些少以逸待勞之效，呢匹賀賢接手未交代嘅馬，今次值得大家跟進。