「首飾大帝」季初喺四班贏完後，升上三班便一籌莫展，馬房於是安排隻馬去放草，由一月廿四日放到三月六日，期間總共抖咗四十一日，放咗咁長假，當然希望隻馬回復番角逐興趣。不過最近呢隻馬喺六月十一日復出角逐田草千六米，雖然係久疏戰陣，但依然被捧成三倍大熱門馬，結果希望越大失望更大，最終跑第十二名。賽後呢隻熱門馬當然被安排接受獸醫檢驗，份報告話無任何發現，小組要呢隻馬經過試閘合格先至可以上陣。最近「首飾大帝」由楊明綸試課泥地大閘，全程輕輕鬆鬆跑第四名返嚟，目的志在攞到上陣資格，結果求仁得仁。馬房今次唔同呢隻馬出戰草地中距離賽程，選擇初跑泥地一哩，顯然蔡神仙有一番心思。據悉，「首飾大帝」上場跑得差係有原因，其中一個係角逐興趣問題，馬匹似乎對草地冇之前咁有濃厚角逐興趣，所以放完草返嚟都冇乜起色，馬房安排呢隻馬考完閘後，決定轉報泥地賽，查呢個血統嘅馬有好多跑泥地性能都唔錯，好似「君悅灣」同「亞馬寶寶」泥地都曾經有過頭馬或上名成績，最特別都係呢兩隻同父馬，跑一兩次泥地就有表現，「君悅灣」第二次跑泥地即喺千二米獲亞軍，因第一次跑一哩未有氣量支持就無成績交出，以最初期「君悅灣」性能而言，短途較中距離佳；「亞馬寶寶」跑一次泥地就得亞軍。所以呢系馬初跑泥地威力特強，可能是有多少新鮮感，今次雷神肯再騎，值得再追多鋪。