新練馬師麥菲文與羅富全被安排咗去奧運馬房嗰邊，接替胡森及薛達志空缺，早前麥菲文有批A布新馬經已由澳洲運抵香港，就快隔離期滿可以分倉，而呢兩個舊馬房，馬會經已一早搵人翻新，所以幾時都可以搬得入去，不過，羅富全最後都係唔想搬去奧運倉嗰邊，佢希望搬入吳定強嗰度，事關呢個馬房今季贏唔夠數，一定要散倉，羅富全跟開蔡約翰，對呢邊所有設施都可以話用慣用熟，好似機坪及游水池都熟習晒環境，假如搬到奧運倉，要馬匹去彭福公園踱步，羅富全真係未試過，點樣操法仲有排學，即使學得曉，奧運倉呢邊風水麻麻，所以俾羅富全有得揀，梗係唔去胡森或薛達志舊址。
講番今季要散倉嘅吳定強，有啲馬主都好支持佢，早排有幾隻馬唔跑退役，費事諗第二個倉，所以呢個世界都有多少人情味，好似「銀豐神駒」呢位馬主余國賢咁，佢家族養馬唔少，同主嘅「勇霸神駒」就養喺高伯新馬房，今季經已贏咗兩場，呢隻「銀豐神駒」上季新馬來港，立刻投入吳定強馬房，並唔係嗰啲五勞七傷嘅馬，要吳定強妙手回春。不過吳定強一向屬慢熱派，「銀豐神駒」要第二季先至贏到馬，配韋達喺千四米後上取勝，贏「金錢路」及「福愛寶」，「金錢路」未幾退咗役，「福愛寶」今季三W，「銀豐神駒」可以贏到呢一批馬的確唔簡單，雖然大家都知道呢匹係好嘢，但吳定強保持向來鮮有連捷馬嘅作風，「銀豐神駒」在港開齋後，其後一直輸，大家睇睇現時評幾多分，只係五十六分，咁即係回復番贏馬時候一模一樣嘅分數，睇嚟呢位大師，真係耐性十足，一隻健康正常嘅馬，贏完馬輸幾場又可減到贏馬分數，吳定強煞科後便退休，自然想留番個美好回憶，而「銀豐神駒」今場贏面相當高，大有機會成為強哥收山馬。
