唔知係咪有個不成文規矩，就係冠軍騎師或冠軍練馬師，煞科日例有頭馬，冠軍騎師莫雷拉要贏馬真係易如反掌，冇馬贏先係新聞。而蔡約翰呢個冠軍練馬師，去到季尾捧盃呢一日，必定有馬贏助一助威，今次佢出咁多隻馬之中，贏一場應該唔係問題，甚至有可能贏三幾場，當中大家一定要留意隻「天下為攻」，上場唔夠兩倍輸到三甲不入，其實，並唔係輸初上三班跑，只係輸臨場有啲情緒問題，大家仲記唔記得當日黎海榮騎隻「回憶」等入閘，突然間俾隻馬摔落馬背，隻馬順勢走甩咗，當時要儀仗馬去捉，搞到入閘啲馬退番出來。而呢日天氣陽光普照，氣溫三十度以上，「天下為攻」俾呢啲無謂意外影響，成身都見汗濕，有時新馬適應呢啲咁炎熱天氣真係唔容易，「天下為攻」一直流汗，最終捉番隻「回憶」，等佢退出埋其他馬再重新入閘，呢一場大大話話各駒企喺閘前成十幾分鐘，所以「天下為攻」初初跟兩段，末段就散晒。從復課所見，「天下為攻」狀態一樣咁靚，呢次再跑千二米贏馬路程，如果冇乜意外，都應該可以補中，不過，馬房亦作出好多事後補救措施，每隔兩三日就安排呢隻馬到亮相圈遊花園，等佢情緒可以更穩定，二來遊花園嘅作用，就係俾佢有個就快出賽嘅提醒。睇呢日蔡約翰咁多隻列陣馬，「天下為攻」一定係變倍器，其他馬匹戰意好，話唔定可以錦上添花，大家不妨戥蔡神開心，捧吓呢隻馬場，贏番多少歇暑費。
