馬季開鑼至今已經跑了三期賽事，馬迷若係心水清的話，應該會感覺到成日喺頭場賽事拉頭馬嗰陣時，唔係見到莫雷拉就係見到蘇偉賢。的確，呢兩位騎練今季已經各自贏咗兩次頭場賽事，開鑼日嗰場仲要係兩位合作贏馬嘅，叫佢哋做頭場搵馬本殺手，絕對無誇張失實。咁啱呢兩位頭場殺手喺今晚第一場就有隻「必定掂」合作，仲要咁巧合又抽到黃金一檔，信邪嘅馬迷就真係要留意吓啦。周一最後試跑蘇偉賢亦都安排「必定掂」到草地快跳，課後雷神向練馬師匯報嗰陣，郁晒手咁動態甚緊張，似乎對呢隻馬都頗有期望。「必定掂」上季跑咗四場只係拎過一個季軍，論成績就絕對唔算標青，但係蘇偉賢上周三就有隻「好富有」同樣喺上季無料到，但今季一出就即刻有馬贏，證明呢個馬房嘅馬要跨季變身絕對唔奇。再加埋雷神咁擅於幫處女馬開齋，今次隨時又見到呢對騎練組合喺頭場先拔頭籌。