第二場、第三班、一八○○米。既然係跑中長途賽事，經過熱身開氣之馬，肯定會更佔優勢，而「家樂駿駒」在外地贏過此程，更曾於二千米一再上名，上仗初出憑新鮮感跑一哩尚且可以應付，熱身後增程當然係最佳部署，事實上，剛戰此駒早段留得較後，但轉入直路仍然可以收復不少失地取得殿軍，演出確有驚喜，試準谷草性能之後，今仗再戰大有事半功倍之效，有權打破悶局。
第三場、第五班、一八○○米。「鼓浪飛星」上季初出配寶遜於谷草一哩獲亞，反映季初搶攻一樣掂；上仗作季內初出，臨場被捧至不足七倍，已經反映有一定信心，可惜出閘論盡先機盡失，其後憑內檔之助跟在馬群中間位置，最後追獲第五名，如果出閘能夠醒目多少，相信是有機會進佔三甲；經熱身後相隔兩周增程再戰，路程更合適，上周四彈草閘目標明確，只要出閘順利有權補中。
第五場、第四班、一二○○米。「創意寶」已差不多兩年未再贏馬，相信幕後開始有交代壓力，唯一擔心係目前評四十二分，減多兩分就可以落到五班稱王，不過此駒上仗初出在谷草一千米排十一檔，從後如飛殺上取得殿軍，如此一來想減分就要花費更多時間，所以估計幕後並不希望落班，反而四班有更多賽程可以選擇，令到部署更得心應手，熱身後增程千二，提防憑輕磅贏馬。