今季已跑過五次賽事，田泰安次次有馬贏，目前贏咗九場頭馬，的確手風順，而周日田泰安入蘇保羅馬房，倉主經已準備好「實力飛駒」由田泰安喺地堂踱步，仲安排多一隻有賽程廄侶「金碧光芒」副練魯柏軒拍踱，只見呢兩隻馬前胸肌肉起晒柳條紋，好鬼吸引。「實力飛駒」與「金碧光芒」兩隻馬今戰都配田泰安跑，「實力飛駒」跑第七場三班千二米，呢個路程當然冇一千米咁好發揮，但手足指呢隻馬每季第一鋪均順利勝出，今季第三季在港上陣，雖然路程再唔係跑一千米，但隨年齡增長，增程二百米未必唔啱發揮，以田泰安手風順，俾佢替呢隻馬作突破，絕對有贏馬條件。
至於另外隻「金碧光芒」，跑第五場四班千二米，計性能呢個路程當然並非最佳射程，呢隻馬暫時贏過場谷草千八米，不過窄場千二米亦曾經得過第三名，睇目前狀態依然唔錯，係有機會攻入前列，如果玩吓三重彩及四連環，不妨兼顧埋呢隻冷腳，論狀態真係唔錯。
威震天田泰安督操
田泰安入完蘇保羅馬房探佢兩隻戰駒後，旋即又入去姚本輝個倉睇「威震天」，呢隻粗身馬，要多跑多操才有水準，近期除大閘外，午間更安排機坪踱步、行馬機及游水等等額外活動，希望等呢隻馬可以快啲收身上力，據悉現時狀態起得唔錯，田泰安入倉見到位華籍助手替呢隻馬走花蹄，佢亦聚精會神睇實隻馬，睇佢神情相當緊張，估計又係起筷時候，要盯實佢啲坐騎。
金多多潘頓話轉場
莫雷拉上次日賽狂掃5W，跑咗五個賽馬日，經已贏出十五場頭馬，而今個月仲有三次馬未跑，換句說話呢個月獎金肯定超過百萬，大家都識數手指，跑十個月每個月有過球收入，閒閒哋擸千萬獎金可以預計。
莫雷拉手風咁順，通常佢都未必會殺絕，接連咁搶攻，今次夜賽大家不妨吼番潘頓，睇番開鑼日莫雷拉又係掃五場，翌仗跑夜馬收斂番啲，立刻有其他騎師殺番上嚟，好似潘頓咁，呢晚就係憑「事必獲利」開齋。而潘頓喺周日假期依然入倉探班，睇動態，佢希望趁雷神仲消化緊五W獎金時候，乘機贏番一兩個W幫補吓個荷包。
周日有馬房手足見到潘頓六點鐘鬆啲入蘇保羅倉，原來專程睇「金多多」，呢隻馬對潘頓嚟講一啲都唔陌生，前季仲係由孫達志訓練時候，佢就經已騎過呢隻馬上陣出擊，但未竟全功，孫達志散倉後再轉投入沈集成馬房，由於只逗留兩個月時間，好快咁又轉到蘇保羅馬房，喺沈集成所訓練嘅短短兩個月時間，馬房積極搵雷神出擊，一樣唔能夠成功，直至轉入蘇保羅後，喺上季中曾經搵過潘頓替呢隻馬操刀，列陣泥地千二米搏過一劑，僅輸頸位得第二名，依然贏唔到，自此馬匹再未有任何上名紀錄，今次馬房安排呢隻馬跑谷草千二米，原來屬潘頓意思，因為佢評價呢隻馬衝力短，假如跑田草大場，一定唔容易贏，相反谷戰直路短，跑埋多少走位，有機會喺窄場建央A加上現時評分落到四班又係有利，所以潘頓對呢隻「金多多」緊張係有因。